Britaniyada 1100 ga yaqin mahbuslar qamoqxonaning haddan tashqari to‘lgani sababli kelasi hafta muddatidan avval ozodlikka chiqadi.
Sentyabr oyida 1,7 ming nafardan ortiq jinoyatchi ham Britaniya jazoni o‘tash muassasalarida joy yo‘qligi sababli shartli ravishda ozod qilingan. 40 ga yaqin mahbus xato tufayli ozod qilingan va qamoqxonaga qaytarilgan.
“Yana 1100 nafar mahbus kelasi hafta boshida ozod qilinadi”, deyiladi xabarda.
Times nashriga ko‘ra, ular 22-oktyabr kuni ozodlikka chiqariladi.
Iyul oyida Buyuk Britaniya adliya vaziri Shabana Mahmud Angliya va Uelsdagi mahbuslarga jazo muddatining 40 foizini o‘taganidan so‘ng qamoqdan ozod qilinishiga imkon beruvchi yangi shartli ozodlik mexanizmini e’lon qilgandi. Yangi choralar terrorizm, oilaviy zo‘ravonlik, jinsiy zo‘ravonlik va boshqa bir qator og‘ir jinoyatlarda ayblangan shaxslarga nisbatan qo‘llanilmaydi.
Adliya vazirligining xabar berishicha, 2023-yil boshidan buyon erkaklar qamoqxonalari muntazam ravishda 99 foizga to‘ldirilgan. Times hukumatdagi manbalariga tayanib yozishicha, Britaniya Adliya vazirligining ichki prognozlariga ko‘ra, 9 oy ichida qamoqxonalarda yana joy taqchilligi kuzatiladi.
Izoh (0)