“Daryo” nashri 23-fevralda O‘zbekiston va jahonda sodir bo‘lgan eng muhim voqealarni e’tiboringizga havola etadi.
Ukrainaga zamonaviy G‘arb qiruvchilari berilmaydimi?
Ukraina Rossiya hududiga zarba berish uchun G‘arb samolyotlari va uzoq masofali qurollardan foydalanmaslikka kafolat bera oladimi?
Bu savolga Ukraina tashqi ishlar vaziri Dmitriy Kuleba Sky News telekanaliga bergan intervyusida javob berdi.
“Biz G‘arb qurollaridan Ukraina hududlarini ozod qilish uchun foydalanishga kafolat berishimiz mumkin”, — deydi Kuleba.
G‘arb davlatlari yanvar oyida Kiyevga reaktiv qiruvchi samolyotlar yetkazib berish masalasini muhokama qila boshlagan. Ukraina prezidenti Vladimir Zelenskiy ularning yetkazilishiga erishishga va’da bergan.
Hozirda bu g‘oyani Boltiqbo‘yi mamlakatlari qo‘llab-quvvatlamoqda, deb yozadi Politico.
“Bunday qaror qabul qilish oson bo‘lmaydi”, — deydi Polsha prezidenti Anjey Duda. Germaniya kansleri Olaf Shols esa G‘arb qiruvchilarining yuborilishini rad etib, bu mavzu muhokamasini to‘xtatishga chaqirgan.
Ayni vaziyatda AQSH ham Kiyevga jangovar samolyotlar bilan yordam va’da qilishdan bosh tortdi, ammo uchinchi davlatlardan birortasi yordam bermoqchi bo‘lsa, Amerika buni mamnuniyat bilan qabul qiladi, deya ta’kidlagan Oq uy.
Buyuk Britaniya mudofaa vaziri Ben Uollesning aytishicha, Ukraina Rossiya bilan urush tugaganidan keyingina zamonaviy G‘arb qiruvchilarini olishi mumkin. U buni Kiyevning g‘arbiy hamkorlari o‘rtasidagi konsensus deb atadi.
Arab davlatlari Nablusdagi falastinliklarning o‘ldirilishini qoralab chiqdi
Arab davlatlari Isroil armiyasining falastinliklarga qarshi uyushtirgan jazo reydini qoralab chiqdi.
Saudiya Arabistoni, Qatar, Birlashgan Arab Amirliklari, Kuvayt, Ummon, Misr, Tunis davlatlari Isroil armiyasining Nablusdagi harakatlarini qoraladi — reydda 11 falastinlik halok bo‘lgan, 100 dan ortiq kishi yaralangan.
Arab parlamenti, Arab davlatlari ligasi va Fors ko‘rfazidagi arab davlatlari hamkorlik kengashi Isroilni xalqaro huquqni qo‘pol ravishda buzganlikda va Falastin hududlarida keskinlikni kuchaytirganlikda aybladi.
22-fevral kuni Isroil mudofaa kuchlari okkupatsiya qilingan G‘arbiy sohil shimolidagi Nablus shahrida navbatdagi reyd davomida falastinliklarga qarshi qurol ishlatdi va bu bosqin yana odamlar o‘limiga sabab bo‘ldi. Isroil harbiylari shaharga bir necha tomondan bostirib kelgan. Ular eski shahar hududidagi uylardan birini o‘rab olgach, tartibsizliklar boshlangan.
Turkiyadagi zilziladan so‘ng aybdorlar hibsga olinmoqda, vayron bo‘lgan shaharlar qancha muddatda tiklana oladi?
Zilzilalardan so‘ng Turkiya hukumati 341 kishini hibsga oldi — ular binolarni qurish vaqtidagi talonchilik va qoidabuzarliklarda ayblanmoqda, deb xabar berdi TRT Haber.
Zilziladan jabr ko‘rgan 11 viloyatda olib borilgan tekshiruvlari natijasida 564 kishining qurilishdagi qoidabuzarliklari aniqlanib, 160 nafari qo‘lga olingan.
282 kishi esa talonchilikda ayblanmoqda, hozirda ulardan 181 nafari hibsga olingan.
Turkiya prezidenti Rajab Toyyib Erdo‘g‘onning so‘zlariga ko‘ra, zilziladan jabr ko‘rgan hududlarda qurilish ishlari mart oyida boshlanadi. 11 viloyatda 200 mingga yaqin turar joy binolari qurilishi rejalashtirilgan.
Erdo‘g‘on zilzila zonalarida biznes va investitsiyalarni qo‘llab-quvvatlash uchun jami 1 milliard dollar miqdorida yordam ko‘rsatilishini va kredit kafolat jamg‘armasi hajmini 13,2 milliarddan 18,5 milliard dollarga oshirishini maʼlum qildi.
“Uy-joy, ish o‘rinlari, sanoat, qishloq xo‘jaligi, tarixiy va madaniy qadriyatlari bo‘lgan barcha shaharlarimiz to‘liq tiklanadi. Yangi binolar uch yoki to‘rt qavatdan baland bo‘lmaydi”, — deya ma’lum qilgan prezident.
Shu orada Istanbul meri Ekrem Imomog‘lu metropoliyadagi qulash xavfi eng yuqori deb tasniflanayotgan uylarni buzish boshlanganini e’lon qildi.
O‘zbekistonga ta’sir qiladigan suv toshqiniga qanday omil sabab bo‘lmoqda?
Mutaxassislar Tojikistondagi zilzila oqibatida Sarez ko‘li suv toshqiniga sabab bo‘lishi, bu esa Markaziy Osiyoning to‘rtta davlatiga ta’sir qilishini ma’lum qildi. Bu haqda Sputnik xabar bermoqda.
Ma’lum qilinishicha, Sarez ko‘li yaqinida 7,3 magnitudali zilzila qayd etilgan. Ushbu jarayonda qurbonlar va vayronalarning oldi olindi, ammo suv ombori yaqinidagi hudud o‘n yildan ortiq vaqtdan beri mamlakatga tahdid solmoqda.
Hozirda Sarez ko‘lining chuqurligi 500 metrga yetadi, umumiy hajmi esa 17 kub kilometrni tashkil etadi.
Usoy to‘g‘onining vayron bo‘lishiga olib kelishi mumkin bo‘lgan zilzila va ko‘chkilar “geologik qamoqxona”dan ulkan hajmdagi suvning sizib chiqishiga olib keladi. Moskva davlat universiteti mexanika institutining hisob-kitoblariga ko‘ra, oqibatda balandligi 150 metrgacha bo‘lgan sel 3 kilometrdan ortiq balandlikdan chiqib ketadi. Vodiylarda to‘lqin balandligi 15 metrga tushadi, bu uch qavatli uyning balandligiga teng. Mazkur favqulodda holat nafaqat Tojikiston, balki O‘zbekiston, Qirg‘iziston va Turkmaniston hududlariga ham ta’sir qiladi.
Tojikiston bu masalani boshqacha hal qilishga, ya’ni Sarez ko‘lidagi ichimlik suvini xorijga sotishga qaror qildi. O‘nlab davlatlar bilan muzokaralar olib borildi, biroq faqat Xitoy kelishuvga rozi bo‘ldi.
Hozirda Sarez ko‘li tun-u kun kuzatuv ostida. Mutaxassislar suv omboridagi har qanday o‘zgarishlarni kuzatib boradi. Sababi suv sathi keskin o‘zgargan taqdirda, darhol trevoga e’lon qilinishi kerak.
Izoh (0)