AQSH prezidenti Jo Bayden Germaniyaga tashrifi yakunlari bo‘yicha G‘arb ittifoqchilari Ukrainaning Rossiya hududiga hujum qilish uchun uzoq masofali qurollardan foydalanishi masalasida haligacha yakdil fikrga erisha olmaganini aytdi, deb yozadi Bloomberg.
16-oktyabr kuni Oq uy matbuot kotibi Karin Jan-Pyer AQSH Rossiya hududiga uzoq masofali zarbalar berish uchun Amerika qurollaridan foydalanishni Ukrainaga taqiqlaganini aytgandi.
Avvalroq Britaniyaning LBC radiostansiyasi manbalarga tayanib, Bayden ma’muriyati Ukrainaning uzoq masofaga uchuvchi qurollardan foydalanishga oid siyosatini o‘zgartirish vitse-prezident Kamala Xarrisning saylovoldi kampaniyasiga zarar yetkazishidan qo‘rqishini xabar qilgandi. Radiostansiyaga ko‘ra, Qo‘shma Shtatlar va Buyuk Britaniya oxir-oqibat Kiyevning Rossiyaga zarba berish uchun uzoq masofali qurollardan foydalanishini ma’qullashi mumkin, ammo ular buni “yashirin” qilishadi va “birinchi raketalar uchirilgandan” keyin qarorni rasman e’lon qilishadi.
Bayden avvalroq Ukraina uchun uzoq masofali qurollardan foydalanish bo‘yicha cheklovlarni bekor qilish masalasi ko‘rib chiqilayotganini ma’lum qilgan edi. AQSH davlat kotibi Entoni Blinken Sky News telekanaliga bergan intervyusida AQSH prezidenti Ukrainaga Rossiya hududiga raketa zarbalari berishga ruxsat berishi mumkinligini aytdi.
Rossiya prezidenti matbuot kotibi Dmitriy Peskov avvalroq Kreml Qo‘shma Shtatlar Rossiya hududiga zarba berish uchun ATACMS raketalarini qo‘llashga qo‘yilgan cheklovlarni bekor qilishga qaror qilgan, degan taxminni ilgari surgandi. Peskov Vashingtonga bunday qarorga munosib javob berishga va’da berdi.
Izoh (0)