Bugun, 17-oktyabr kuni Toshkent shahrida “Xalqaro hamkorlik tashabbuslari haftaligi” doirasida turli sohalarga doir muloqotlar boshlandi. Bu haqda “Daryo” muxbiri xabar berdi.
Tadbirlar avvalida Senat raisi o‘rinbosari Sodiq Safoyev va Quyi palata spikeri o‘rinbosari Akmal Saidov chiqish qildi. Boshlovchi “O‘zbekiston o‘n yildan keyin qanday bo‘lishi kerak?”, deya parlamentning ikki yirik vakiliga savol berdi.
Sodiq Safoyev fikricha, hech bir mamlakat o‘zini umumbashariy muammolardan ayro ko‘ra olmaydi.
“Butun dunyo oldida turgan muammolar bevosita O‘zbekistonga ham o‘z taʼsirini ko‘rsatmoqda. Masalan, ekologiya muammosi, to‘rtinchi sanoat inqilobi va boshqalar. Transmilliy, transchegaraviy tahdidlar mintaqani, shu jumladan O‘zbekistonni ham chetlab o‘tamayotgan, bezovta qilayotgan masala. Lekin bizda ichki muammolar ham bor. Misol uchun, ish o‘rinlari yaratish, investitsiyalarni ko‘paytirish, taʼlim sifatini yangi pog‘onaga ko‘tarish. Bularsiz hech bir mamlakat rivojlana olmaydi.
O‘n yildan keyin O‘zbekiston qanday bo‘lishi kerak, dedingiz. Avvalo, bu savolga mamlakatimiz strategiyasini ishlab chiqish orqali javob berishga harakat qilganmiz. U — “O‘zbekiston 2030” strategiyasi. Uning mazmunini muxtasar qilib aytsak, O‘zbekistonni siyosiy-iqtisodiy jihatdan modernizatsiya qilishni o‘z ichiga oladi. Agar biz shunga erishsak, raqobatbardosh, eng rivojlangan davlatlar safiga kiramiz. Iqtisodiy, siyosiy transformatsiya davrida o‘zligimizni yo‘qotmagan holda O‘zbekistonni rivojlantirish ustuvor vazifa. Inson haq-huquqlari hurmat qilingan, moddiy va nomoddiy ehtiyojlar to‘liq taʼminlagan mamlakatga aylanish barchamizning orzumiz”, dedi senator.
Oliy Majlis Qonunchilik palatasi spikerining birinchi o‘rinbosari Akmal Saidov ham mazkur savolga javob berdi.
-zap1GnMf.jpg)
“O‘zbekistonning keyingi o‘n yilligini jahonda yuz berayotgan voqea-hodisalardan ayro ko‘rish mumkin emas. Shuning uchun ham BMT tomonidan qabul qilingan Barqaror rivojlanish maqsadlarini bajarish bo‘yicha “O‘zbekiston 2030” strategiyasi qabul qilingan. Hujjatni milliy yo‘l xaritasi deb baholash mumkin. Shu strategiya asosida 2030-yilgacha O‘zbekistonni dunyodagi o‘rta darajada rivojlangan davlatlar qatoriga olib chiqish maqsad qilingan. Bunda iqtisod, siyosat va madaniyat birgalikda rivojlantiriladi. O‘zbekiston Markaziy Osiyodagi yetakchilik rolini 10-yildan keyin ham saqlab qoladi deb o‘ylayman”, dedi parlament masʼuli.
Muloqotda Sodiq Safoyev O‘zbekiston mintaqaviy mavqega ega (regionalnaya derjava) davlatga aylanayotganini aytdi.
“O‘zbekiston o‘z mavqeyi bo‘yicha Markaziy Osiyo va undan kengroq hududlarga taʼsir ko‘rsata oladi. Buni misollari ko‘p. Aytaylik, Markaziy Osiyoda muhitning o‘zgarishi. Biz bugun Markaziy Osiyo ruhi haqida gapiryapmiz. Agar 5-6 yil oldin mintaqada strategik mavhumlik, qayoqqa qarab ketayotganimiz, harbiy mojarolar bo‘lishi mumkinligi haqida gapirilgan bo‘lsa, bugun barcha insonlar aytyaptiki, Markaziy Osiyo dunyodagi yagona tinch va barqaror rivojlanayotgan mintaqadir”, dedi diplomat.
Haftalik tadbirlarida mahalliy va xorijiy ekspertlar, vazirlik va idoralar vakillari qatnashmoqda. Bir hafta davomida ular ishtirokida 50 dan ziyod anjuman, davra suhbatlari va amaliy muloqotlar o‘tkazish rejalashtirilgan. Shu bilan birga, xorijiy mamlakatlar va xalqaro tashkilotlar bilan turli sohalarga doir bitimlar imzolash, qo‘shma loyihalarni bo‘yicha qarorlar qabul qilish kutilmoqda.
Izoh (0)