BMT Bosh assambleyasi sessiyasida O‘zbekistondan qator takliflar ilgari surildi

BMT Bosh assambleyasining 79-sessiyasida O‘zbekiston TIV rahbari Baxtiyor Saidov nutq so‘zladi.

“Prezidenti Shavkat Mirziyoyev janobi oliylarining BMT rahbariyati, davlat rahbarlari va sessiyada ishtirok etayotgan delegatsiyalarga tinchlik va farovonlik ezgu tilaklarini yetkazdik.

Biz dunyoning ko‘p nuqtalarida notinchliklar kuchayib borayotganiga guvoh bo'lmoqdamiz. Iqlim o‘zgarishi, kambag‘allik, texnologik nomutanosiblik kabi dolzarb muammolarni hal qilishda barchani yaqinroq global hamkorlikka chaqiramiz”, deb yozdi vazir Telegram’dagi sahifasida.

Uning bildirishicha, sessiyada O‘zbekiston nomidan quyidagilar taklif qilindi:

• rivojlanayotgan davlatlar imkoniyatlarini kengaytirish maqsadida xalqaro moliya tizimini isloh qilish;
• barcha uchun xavfsiz, foydalanish mumkin bo'lgan raqamli texnologiyalar bilan ta'minlash;
• iqlim o'zgarishiga qarshi kurash bo'yicha xalqaro hamkorlikni, ayniqsa Markaziy Osiyoning zaif mintaqalarida kuchaytirish;
• ayollar va yoshlar imkoniyatlarini kengaytirish;
• terrorizm va korrupsiyaga qarshi kurashishda harakatlarni birlashtirish;
• Markaziy Osiyo va undan tashqarida transport koridorlari va iqtisodiy aloqalarni kengaytirish;
• Termiz shahridagi Afg‘oniston fuqarolari uchun o‘quv markazini Global o‘quv markaziga aylantirish.

Baxtiyor Saidov barqaror rivojlanish maqsadlariga sodiqlik va Markaziy Osiyoda tinchlik va barqarorlikni ta’minlashda faol ishtirok etish O‘zbekistonning asosiy ustuvor vazifalari bo‘lib qolishini qayd etdi.

2023-yilda BMT Bosh assambleyasining 78-sessiyasida Shavkat Mirziyoyev ishtirok etib, nutq so‘zlagandi. Unda  global va mintaqaviy kun tartibidagi eng dolzarb masalalar yechimiga qaratilgan qator tashabbuslarni ilgari surdi.