Janubiy Koreya bilan hamkorlikda Sirdaryo va Jizzaxda quruqlik porti qurilishi bo‘yicha texnik iqtisodiy asoslantirish ishlab chiqiladi. Bu haqda Transport vazirligi matbuot xizmati xabar berdi.
Ma’lum qilinishicha, vazirlik huzuridagi Transport va logistikani rivojlantirish muammolarini o‘rganish markazi va Janubiy Koreya Okeanlar va baliqchilik vazirligining Port investitsiyalar departamenti vakillari o‘rtasida uchrashuv bo‘lib o‘tdi.
Uchrashuvda tomonlar logistika infratuzilmasini yaratish va modernizatsiya qilish sohasidagi hamkorlikni rivojlantirish bilan bog‘liq jihatlar ko‘rib chiqishdi. Xususan, Sirdaryo va Jizzax viloyatlarida quruqlik porti va ichki terminallarning qurilishi bo‘yicha texnik-iqtisodiy asoslashni ishlab chiqish masalalari muhokama etildi. 2024-yil 9-avgustda boshlangan loyiha 13 oyga mo‘ljallangan bo‘lib, 2025-yil 12-sentyabrda yakunlanadi.
Qayd etilishicha, loyihaning maqsadi ushbu hududlarda quruq portni rivojlantirish bo‘lib, bu mamlakatning logistika infratuzilmasini yaxshilashga yordam beradi. Ichki terminallarning tashkil etilishi O‘zbekistonning logistika mustaqilligini oshirish va uning Markaziy Osiyodagi asosiy logistika markazi sifatidagi rolini mustahkamlash yo‘lida muhim qadam bo‘ladi.
O‘zbekiston 2021-yilda BMT Osiyo va Tinch okeani iqtisodiy va ijtimoiy komissiyasining “Quruqlik portlari” to‘g‘risidagi bitimga qo‘shilgan. 2013-yil 1-mayda Bangkokda tuzilgan bitimning asosiy maqsadi Osiyo va Tinch okeani mintaqasi mamlakatlarining xalqaro ahamiyatga ega “quruqlik portlari” tarmog‘ini rivojlantirish siyosatini muvofiqlashtirishdan iboratdir.
Xalqaro ahamiyatga ega “quruqlik porti” deganda bir yoki undan ortiq transport turlari bilan bog‘langan, qayta ishlash, vaqtincha saqlash va xalqaro savdo jarayonida tashilayotgan yuklarni qonuniy talablarga ko‘ra ko‘rikdan o‘tkazishda hamda tegishli bojxona nazorati funksiyalari va rasmiylashtirishni amalga oshirishga mo‘ljallangan logistik markazga ega mamlakat hududlaridagi joy tushuniladi.
Izoh (0)