O‘zbekiston, Qirg‘iziston va Qozog‘iston energetika va suv xo‘jaliklari vazirlarining navbatdagi uchrashuvi bo‘lib o‘tdi, deb xabar bermoqda O‘zbekiston Energetika vazirligi matbuot xizmati.
Ma’lum qilinishicha, 12-oktyabr kuni bo‘lib o‘tgan uchrashuvda O‘zbekiston energetika vaziri Jo‘rabek Mirzamahmudov, O‘zbekiston suv xo‘jaligi vaziri Shavkat Xamrayev, Qozog‘iston energetika vaziri Almasadam Satkaliyev, Qozog‘iston suv xo‘jaligi va irrigatsiya vaziri Nurjon Nurjigitov va Qirg‘iziston energetika vaziri Taalaybek Ibrayev hamda boshqa mutasaddi rahbarlar ishtirok etdi. Shuningdek, Ozarbayjon energetika vaziri o‘rinbosari K.Abbosov mehmon sifatida qatnashdi.
Uchrashuvda mamlakatlar suv-energetika tizimining kuz-qish mavsumida barqaror ishlashini ta’minlash masalalari muhokama qilindi va tarmoqlar ish rejimlarining grafiklari kelishildi.
Mazkur tadbirda tomonlar o‘rtasida hamkorlikda amalga oshirilayotgan loyihalar, xususan, Qambarota GES-1 qurilishi loyihasining hozirgi holati hamda suv-energetika balansini muvofiqlashtirish masalalari ko‘rib chiqildi.
Shu bilan birga, uchrashuvda Xitoyning CEEC kompaniyasi vakillari bilan Qirg‘izistonning Jalolobod viloyatida “Chotqol” GES qurilishi yuzasidan o‘tkazilgan dastlabki o‘rganishlar va kelgusidagi rejalar muhokama qilindi.
Uchrashuv so‘ngida tomonlar o‘rtasida doimiy ishchi guruh yig‘ilishlarini o‘tkazib turish va loyihalarni amalga oshirish yuzasidan “yo‘l xaritasi”ni imzolash taklif etildi hamda tegishli hujjatlar imzolandi.
Izoh (0)