Rossiya prezidenti Vladimir Putin 11-oktyabr kuni Turkmanistonga amaliy tashrif bilan boradi. Bu haqda uning yordamchisi Yuriy Ushakov ma’lum qildi.
11-oktyabr kuni prezident Turkmaniston rahbarining taklifiga binoan amaliy tashrif bilan Ashxobodda bo‘ladi. Vladimir Vladimirovich Putin turkman shoiri va mutafakkiri Maxtumquli Firog‘iy tavalludining 300 yilligiga bag‘ishlangan “Davrlar va sivilizatsiyalar aloqasi — tinchlik va taraqqiyot asosi” xalqaro forumida ishtirok etadi, deydi Ushakov.
Ta’kidlanishicha, forumga Qozog‘iston, Qirg‘iziston, Mo‘g‘uliston, Tojikiston va O‘zbekiston yetakchilari ham tashrif buyuradi.
Turkmaniston hukumati mazkur tadbir “keng qamrovli va o‘zaro hurmatga asoslangan xalqaro muloqot o‘rnatish uchun siyosiy va ma’naviy platforma” bo‘lishini kutmoqda.
Yuriy Ushakov forum doirasida plenar majlis va rasmiy tushlik o‘tkazilishini aytdi. Shuningdek, Putin Ashxobodda ikki tomonlama uchrashuvlar o‘tkazishi mumkin.
Putin Eronning yangi prezidenti bilan uchrashadi
Rossiya prezidenti Turkmanistonga safari davomida Eron prezidenti Mas'ud Pezeshkiyon bilan uchrashadi. Moskva uchrashuv bo‘yicha “allaqachon kelishib olgan”.
Bu uchrashuv ikki tomonlama masalalarni muhokama qilish uchun ham, albatta, Yaqin Sharqda keskin tus olgan vaziyatni muhokama etish uchun ham katta ahamiyatga ega, deb ta’kidladi Ushakov.
Shu bilan birga, u boshqa ikki tomonlama aloqalarni ham istisno qilmagan.
Izoh (0)