Qozog‘iston Xitoy bilan tabiiy gaz eksportini kengaytirish bo‘yicha muzokaralar olib bormoqda va yetkazib berish hajmini oshirish uchun yangi transchegaraviy gaz quvurini qurish imkoniyatini ko‘rib chiqayotgani haqida Bloomberg xabar beradi.
Qozog‘iston Xitoyning energiya resurslariga bo‘lgan talabini qondirish uchun qo‘shni davlatlar, jumladan, Turkmaniston va Rossiya bilan raqobatlashishiga to‘g‘ri keladi.
Rossiya Yevropa gaz bozorining muhim ulushini yo‘qotgach, Xitoy Markaziy Osiyo eksportchilari uchun asosiy muqobil bozorga aylandi. Xitoyda iqtisodiy o‘sish sur’ati pasayganiga qaramay, tabiiy gazga bo‘lgan talab barqarorligicha qolmoqda va bu Qozog‘iston uchun yangi imkoniyatlar yaratadi.
“Xitoyda iqtisodiy pasayish haqidagi xabarlarga qaramay, gazga talab ortib bormoqda”, dedi milliy gaz operatori “KazakGaz” OAJ bosh direktori Sanjar Jarkeshov.
“Biz Xitoyga, shu jumladan, O‘zbekiston kabi boshqa mamlakatlarga ham eksport hajmini oshirish bo‘yicha konsensusga erishamiz degan umiddamiz”, qo‘shimcha qildi u.
Rasmiyning so‘zlariga ko‘ra, Xitoy bilan muzokaralar juda katta hajmdagi gazni eksport qilish bo‘yicha ketmoqda. Mazkur hajm Qozog‘iston eksportining hozirgi darajasidan anchayin yuqori ekani qayd etildi.
Izoh (0)