Oliy Majlis Senati raisi Tanzila Norboyeva Jeneva shahrida o‘tayotgan Parlamentlararo ittifoqning 149-assambleyasida Parlamentlararo ittifoq (PI) bosh kotibi Martin Chungong bilan uchrashdi. Bu haqda Senat axborot xizmati xabar bermoqda.
Uchrashuvda 2025-yilda O‘zbekistonda bo‘lib o‘tadigan Parlamentlararo ittifoqning 150-assambleyasiga tayyorgarlik ko‘rish masalalari muhokama qilingan.
Parlamentlararo ittifoq bosh kotibi Martin Chungongga ko‘ra, ittifoqning 150-yubiley assambleyasi Toshkent shahrida o‘tishi o‘zaro hamkorlikning asosiy voqeligidir.
“Biz yubiley assambleyani tarixiy tadbir qilish istagidamiz. Shuning uchun kun tartibiga kiritiladigan masalalarni ko‘rib chiqib, O‘zbekiston Markaziy Osiyo mintaqasidagi parlamentlarni mobilizatsiya qilishda Parlamentlararo ittifoqqa qanday yordam bera olishini muhokama qildik.
Bundan tashqari, uchrashuvda gender tengligi, ijtimoiy rivojlanish, inson huquqlari kabi mavzularga ham e’tibor qaratdik. Chunki bularning barchasi barqaror rivojlanish maqsadlarining bir qismi hisoblanib, kun tartibidan o‘rin oladi”, dedi Martin Chungong.
Assambleya ishi doirasida Tanzila Norboyeva Parlamentlararo ittifoq Raisi Tuliya Ekson bilan ham uchrashgan. Unda O‘zbekistonda bo‘lib o‘tadigan Parlamentlararo ittifoqning 150-assambleyasi dasturi, tadbirga doir rejalar va yangi loyihalar ham muhokama qilingan.
Izoh (0)