Бугун, 17 октябрь куни Тошкент шаҳрида “Халқаро ҳамкорлик ташаббуслари ҳафталиги” доирасида турли соҳаларга доир мулоқотлар бошланди. Бу ҳақда “Дарё” мухбири хабар берди.
Тадбирлар аввалида Сенат раиси ўринбосари Содиқ Сафоев ва Қуйи палата спикери ўринбосари Акмал Саидов чиқиш қилди. Бошловчи “Ўзбекистон ўн йилдан кейин қандай бўлиши керак?”, дея парламентнинг икки йирик вакилига савол берди.
Содиқ Сафоев фикрича, ҳеч бир мамлакат ўзини умумбашарий муаммолардан айро кўра олмайди.
“Бутун дунё олдида турган муаммолар бевосита Ўзбекистонга ҳам ўз таъсирини кўрсатмоқда. Масалан, экология муаммоси, тўртинчи саноат инқилоби ва бошқалар. Трансмиллий, трансчегаравий таҳдидлар минтақани, шу жумладан Ўзбекистонни ҳам четлаб ўтамаётган, безовта қилаётган масала. Лекин бизда ички муаммолар ҳам бор. Мисол учун, иш ўринлари яратиш, инвестицияларни кўпайтириш, таълим сифатини янги поғонага кўтариш. Буларсиз ҳеч бир мамлакат ривожлана олмайди.
Ўн йилдан кейин Ўзбекистон қандай бўлиши керак, дедингиз. Аввало, бу саволга мамлакатимиз стратегиясини ишлаб чиқиш орқали жавоб беришга ҳаракат қилганмиз. У — “Ўзбекистон 2030” стратегияси. Унинг мазмунини мухтасар қилиб айтсак, Ўзбекистонни сиёсий-иқтисодий жиҳатдан модернизация қилишни ўз ичига олади. Агар биз шунга эришсак, рақобатбардош, энг ривожланган давлатлар сафига кирамиз. Иқтисодий, сиёсий трансформация даврида ўзлигимизни йўқотмаган ҳолда Ўзбекистонни ривожлантириш устувор вазифа. Инсон ҳақ-ҳуқуқлари ҳурмат қилинган, моддий ва номоддий эҳтиёжлар тўлиқ таъминлаган мамлакатга айланиш барчамизнинг орзумиз”, деди сенатор.
Олий Мажлис Қонунчилик палатаси спикерининг биринчи ўринбосари Акмал Саидов ҳам мазкур саволга жавоб берди.
-zap1GnMf.jpg)
“Ўзбекистоннинг кейинги ўн йиллигини жаҳонда юз бераётган воқеа-ҳодисалардан айро кўриш мумкин эмас. Шунинг учун ҳам БМТ томонидан қабул қилинган Барқарор ривожланиш мақсадларини бажариш бўйича “Ўзбекистон 2030” стратегияси қабул қилинган. Ҳужжатни миллий йўл харитаси деб баҳолаш мумкин. Шу стратегия асосида 2030 йилгача Ўзбекистонни дунёдаги ўрта даражада ривожланган давлатлар қаторига олиб чиқиш мақсад қилинган. Бунда иқтисод, сиёсат ва маданият биргаликда ривожлантирилади. Ўзбекистон Марказий Осиёдаги етакчилик ролини 10 йилдан кейин ҳам сақлаб қолади деб ўйлайман”, деди парламент масъули.
Мулоқотда Содиқ Сафоев Ўзбекистон минтақавий мавқега эга (регионалная держава) давлатга айланаётганини айтди.
“Ўзбекистон ўз мавқейи бўйича Марказий Осиё ва ундан кенгроқ ҳудудларга таъсир кўрсата олади. Буни мисоллари кўп. Айтайлик, Марказий Осиёда муҳитнинг ўзгариши. Биз бугун Марказий Осиё руҳи ҳақида гапиряпмиз. Агар 5-6 йил олдин минтақада стратегик мавҳумлик, қаёққа қараб кетаётганимиз, ҳарбий можаролар бўлиши мумкинлиги ҳақида гапирилган бўлса, бугун барча инсонлар айтяптики, Марказий Осиё дунёдаги ягона тинч ва барқарор ривожланаётган минтақадир”, деди дипломат.
Ҳафталик тадбирларида маҳаллий ва хорижий экспертлар, вазирлик ва идоралар вакиллари қатнашмоқда. Бир ҳафта давомида улар иштирокида 50 дан зиёд анжуман, давра суҳбатлари ва амалий мулоқотлар ўтказиш режалаштирилган. Шу билан бирга, хорижий мамлакатлар ва халқаро ташкилотлар билан турли соҳаларга доир битимлар имзолаш, қўшма лойиҳаларни бўйича қарорлар қабул қилиш кутилмоқда.
Изоҳ (0)