Amerikalik milliarder, Tesla va SpaceX asoschisi Ilon Mask AQSH prezidentligi saylovlarida sobiq davlat rahbari Donald Trampni qo‘llab-quvvatlovchi America PAC siyosiy tashkilotiga uch oy davomida 75 million dollar xayriya qildi.
AQSH Federal saylov komissiyasi e’lon qilgan hujjatga ko‘ra, ushbu mablag‘larning 72 million dollari 2024-yil iyul va sentyabr oylari orasida o‘tkazilgan, Mask shu uch oy davomida uning yagona donori bo‘lgan.
The Washington Post nashri tashkilotni “Mask tomonidan Tramp saylovoldi tashviqotini olib borish maqsadida tuzilgan siyosiy harakatlar qo‘mitasi” deb atagan.
“America PAC Trampning ikkinchi muddatga saylanishida asosiy o‘yinchi sifatida paydo bo‘ldi. U respublikachi nomzod uchun mustaqil saylovchilarni yig‘ish bo‘yicha eng ulug‘vor sa’y-harakatlarni amalga oshirmoqda”, deb yozadi nashr.
Reuters nashri ushbu tashkilot o‘z sa’y-harakatlarini shtatlarda saylovchilarni safarbar etishga qaratayotganini ta’kidlagan. Hisobotga ko‘ra, America PAC Trampni qo‘llab-quvvatlash uchun bir xil maqsadlarga ega bo‘lgan boshqa guruhlarga qaraganda ko‘proq pul sarflagan.
AQSH Demokratik partiyasiga ovoz bergan Mask avvalroq joriy saylovlarda Trampni qo‘llab-quvvatlashini ma’lum qilgan edi. O‘zining X ijtimoiy tarmog‘ida milliarder Trampning AQSH chegaralarini noqonuniy muhojirlardan himoya qilish siyosatini, mamlakatda ichki xavfsizlikni mustahkamlash bo‘yicha chora-tadbirlarini, shuningdek, so‘z erkinligini himoya qilish bo‘yicha pozitsiyasini ma’qullashini bir necha bor ta’kidlagan.
Tadbirkor Kamala Harrisni bir necha bor tanqid qilib, xususan, agar u g‘alaba qozonsa, bu saylovlar Qo‘shma Shtatlar uchun oxirgisi bo‘lishini, Tramp esa aksincha, “demokratiyani saqlab qolishning oxirgi yo‘li” ekanini aytgan.
Tramp o‘z navbatida saylovda g‘alaba qozongan taqdirda Maskni maslahatchi yoki vazir lavozimiga tayinlash istagini ma’lum qilgan.
“U juda aqlli odam. Agar rozi bo‘lsa, albatta shunday qilgan bo‘lardim”, degan edi AQSHning sobiq yetakchisi.
Izoh (0)