AQSHning sobiq prezidenti, Respublikachilar partiyasidan prezidentlikka nomzod Donald Tramp raqibi Demokratik partiyadan nomzod Kamala Harrisning aqliy qobiliyatini shubha ostiga oldi.
“Kamala Harrisning kognitiv chidamlilik va aqliy moslashuvchanlik sinovidan o‘tishi juda muhim deb hisoblayman. Uning xatti-harakatlari ko‘pchilikni unda nimadir noto‘g‘ri bo‘lishi mumkin degan fikrga olib keldi”, deb yozdi Tramp Truth Social sahifasida.
Trampning fikricha, Harris “eng asosiy savollarga ham sekin va sust javob beradi”. AQSH prezidenti Jo Baydenga nisbatan ham xuddi shunday shikoyatlari borligiga ishora qilib, Tramp qo‘shimcha qilgan:
“Biz deyarli to‘rt yildan beri bunday holatni boshdan kechirdik, bunga boshqa yo‘l qo‘ymasligimiz kerak”.
Bayden 2024-yilgi saylovlarda ishtirok etmasligi ma’lum bo‘lishidan oldin ham, Tramp Amerikaning amaldagi rahbari kognitiv matndan beshta oson savolga javob bera olmasligini bir necha bor ta’kidlagan.
“Men ikkita kognitiv testdan o‘tdim. Bayden hech bo‘lmaganda bitta juda oddiy testdan o‘tishini ko‘rishni istardim. U hatto birinchi beshta savolga javob berishni ham uddalay olmaydi”, degan edi Tramp iyun oyida bo‘lib o‘tgan debatda.
Izoh (0)