Amerikalik biznesmen Ilon Mask AQSH prezidentligiga nomzod Donald Trampning saylovoldi kampaniyasiga oyiga 45 million dollar ajratishni rejalashtirdi. Bu haqda manbalarga tayanib, Wall Street Journal xabar berdi.
Pulni Amerika PAC deb nomlangan siyosiy faollik bo‘yicha qo‘mita oladi. Bu tashkilot Trampning saylovoldi shtabi bilan bevosita bog‘liq emas. Homiylar orasida harbiy tuzilmalar uchun dasturiy ta’minot ishlab chiquvchi Palantir Technologies hammuassisi Jo Lonsdeyl, AQSHning Kanadadagi sobiq elchisi Kelli Kraft ham bor.
America PAC ikkilanayotgan shtatlarda saylovchilarni ro‘yxatga olish va muddatidan oldin ovoz berishga ishontirish bilan shug‘ullanadi. Tashkilot demokratlar saylovchilar bazasini oshirish bo‘yicha kuchli kampaniyalar o‘tkazganini inobatga olgan va bunga qarshi turishga harakat qilmoqda. Amerika PAC so‘nggi bir necha hafta ichida Tramp kampaniyasiga taxminan 15 million dollar sarfladi.
Avvalroq Mask na Bayden, na Trampning saylovoldi kampaniyalarini moliyalashtirishni ko‘rib chiqishini aytgandi. May oyida Wall Street Journal nashri Mask va Tramp ilgari bir-birini ochiq tanqid qilgan bo‘lsa-da, so‘nggi paytlarda ular bir necha bor telefonda suhbatlashgani haqida yozgandi. Siyosatchiga qilingan muvaffaqiyatsiz suiqasddan so‘ng Mask uni qo‘llab-quvvatlashini bildirgan va Teodor Ruzvelt davridan beri AQSHda “bunday zo‘r nomzod” bo‘lmaganini aytgan.
Izoh (0)