Millarder Ilon Mask 12-avgust kuni o‘ziga tegishli X tarmog‘ida prezidentlikka Respublikachilar partiyasidan nomzod Donald Tramp bilan intervyu tashkil etgan. Bu haqda Reuters nashri xabar berdi.
Manbada aytilishicha, intervyu boshlanishidan oldin X tarmog‘ida juda ko‘plab nosozliklar va uzilishlar kuzatilgan. Shu sababli rejalashtirilgan uchrashuvni boshlash 40 daqiqaga kechikkan.
Ilon Mask yuz bergan tarmoq uzilishlarini kiberhujum deya baholagan. Nomaʼlum manbalar Tramp va Mask intervyusi chippakka chiqishi uchun ushbu hujumni uyushtirgani aytilgan.
Intervyu umumiy hisobda 2 soatdan ortiq davom etgan. Butun X platformasida 1,3 million obunachi intervyuni faol ravishda kuzatib borgan.
Intervyu ikki taniqli shaxsning bir-biriga uzundan uzoq maqtovlari bilan boshlangan. Suhbat avvalida Ilon Mask Trampni suiqasd paytida ko‘rsatgan irodasi uchun “jasoratli” shaxs deb atagan.
Suhbat davomida xalqaro siyosat, saylov kampaniyasi va prezidentlikka nomzodning shaxsiy hayotiga daxldor ko‘plab masalalar ko‘rilgan. Trampning sodir bo‘layotgan voqealarga munosabatini bilishga harakat qilingan.
Tramp agar saylovda g‘alaba qozonsa, Putin bilan til topishishga umid qilayotganini aytgan. Bu Moskva uchun ham, Vashington uchun ham eng manfaatli qaror bo‘lishi aytilgan.
O‘z nutqida Tramp Baydenni Sharqiy Yevropada muammo keltirib chiqarishda ayblagan. Respublikachilar nomzodi so‘zlariga ko‘ra, Kiyevni NATOga chorlash “ahmoqona” qaror bo‘lgan. Buning o‘rniga Putin bilan muzokara olib borish harbiy eskalatsiyaning oldini olgan bo‘lardi.
Tramp saylovdagi raqiblari haqida ham fikrlar bildirgan. U Kamala Harrisni saylov poygasi borasida Baydendan ko‘ra muvaffaqiyatsizroq deb hisoblashini aytgan. Baydenning o‘zini esa davlat boshqaruvi borasida hech qanday aqliy salohiyatga ega emasga chiqargan.
Donald Tramp, shuningdek, AQSH uchun tashqi xavf kuchayishini taxmin qilgan. Sobiq prezident Xitoy yadroviy arsenal hajmi borasida AQSHdan o‘zib ketishi mumkinligi aytgan. Bunga qarshi turish uchun harbiy byudjetni qayta ko‘rib chiqish, Isroildagi kabi “Temir gumbaz” tizimlarini qurish zarurligi aytilgan.
Respublikachilar nomzodi har qanday holatda ham Rossiya va Xitoy yaqinlashuviga yo‘l qo‘yib bo‘lmasligi haqida gapirgan. Bu amalga oshsa, AQSH uchun qiyin kunlar boshlanishi maʼlum qilingan.
Izoh (0)