Ukraina ittifoqchilari prezident Vladimir Zelenskiy urushni tugatish shartlariga bo‘lgan yondashuvini o‘zgartirishi mumkinligini taxmin qilmoqda. Bu haqda Bloomberg xabar berdi.
NATOdagi yuqori martabali amaldorlar hozirda alyans harbiy harakatlarni yakunlash yo‘llarini izlayotganini aytdi. Zelenskiy Ukrainaning asosiy talablari — Rossiya qo‘shinlarini to‘liq olib chiqish va NATOga a’zo bo‘lish ekanini ochiq aytgan bo‘lsa-da, suverenitet yoki hudud bo‘yicha har qanday yon berishni ham istisno qilgan.
Biroq mamlakat urushning uchinchi qishiga tayyorgarlik ko‘rayotgani va G‘arbning qo‘llab-quvvatlashi zaiflasha boshlaganini hisobga olib, Ukraina rasmiylari mojaroni tugatish strategiyasi bo‘yicha muhokamalarni boshlash zarurligiga ishora qildi, deyiladi xabarda.
Bu “Ramshtayn” formatidagi uchrashuvda batafsil muhokama qilinishi kutilgandi. Ammo AQSH prezidenti Jo Bayden Florida shtatiga yaqinlashib kelayotgan “Milton” to‘foni tufayli tashrifini bekor qilgan. Shu bilan birga, Zelenskiy urushni adolatli yakunlash uchun aniq qadamlarni o‘z ichiga olgan “g‘alaba rejasi”ga qo‘llab-quvvatlov olishga intilmoqda.
AQSH rasmiylari Kiyevdan 2025-yil uchun harbiy va moliyaviy yordamni o‘z ichiga olgan harakatlar rejasini ishlab chiqishni so‘ragan. Zelenskiy ittifoqchilar bilan maslahatlashgandan so‘ng reja tafsilotlarini taqdim etishni va’da qilgan.
Biroq, ba’zi G‘arb hamkorlari urushning yakunini aniqroq tasavvur qilish uchun Ukrainaga bosim o‘tkazayotganiga qaramay, u hududiy yon berish imkoniyatini qat’iyan rad etmoqda, deyiladi xabarda.
7-oktyabr kuni Vladimir Zelenskiy shunday degandi:
Biz hamkorlarimizni ushbu urushning qanday yakunlanishini, Ukrainaning global xavfsizlik tizimidagi o‘rnini va bu urushni tugatishga olib kelishi mumkin bo‘lgan birgalikdagi qadamlarni qanday tasavvur qilishlarini belgilashga taklif etamiz.
Kiyev hali “g‘alaba rejasi”ning barcha tafsilotlarini oshkor qilmagan. Ukrainaning NATOga a’zoligi ittifoqchilarni ajratib turuvchi asosiy masalalardan biri bo‘lib qolmoqda. Rasmiylarga ko‘ra, Ukraina alyansga qo‘shilish uchun Baydenga to‘g‘ridan-to‘g‘ri taklif yuborishi borasida bosim o‘tkazilmoqda.
Garchi AQSH prezidentining bunday yo‘l tutishi ehtimoldan uzoq bo‘lsa-da, taklif Kreml ishtirokidagi har qanday muzokaralar uchun potensial vosita sifatida ko‘rilmoqda.
Shu bilan birga, ayrim tahlilchilarning fikricha, ishonchli ikki tomonlama xavfsizlik kafolatlari, ayniqsa AQSH tomonidan beriladigan kafolatlar, amalda a’zolikni o‘rnini bosa olishi mumkin.
Bundan tashqari, AQSHdagi siyosiy vaziyat, xususan, prezidentlik saylovlari urushning kechishiga ta’sir ko‘rsatishi mumkin. Demokratlardan nomzod Kamala Harris Ukrainaning NATOga kirishi bo‘yicha o‘z pozitsiyasini aniqlamadi, Donald Tramp esa urushni tezda tugatishga va’da bermoqda, ehtimol Kiyev foydasiga emas.
Yevropa davlatlari ham moliyaviy qiyinchiliklarga duch kelmoqda, bu esa Ukrainaga yordam ko‘rsatishni qiyinlashtirmoqda. Bundan tashqari, Kiyev Global Janubdan Rossiya bilan tinchlik muzokaralarini faollashtirish talabiga duch kelgan.
Izoh (0)