Parij prokuraturasi jazoirlik bokschi Iman Halifning internetdagi bezorilik aybi bilan bergan shikoyati ortidan tergov boshladi. Bu haqda AFP xabar bermoqda.
--rMqfopm.jpg)
Avvalroq sportchining advokati Nabil Budi Iman Halif ijtimoiy tarmoq orqali haqorat qilingani ortidan sudga murojaat qilganini aytgandi. Ayblanuvchilar orasida yozuvchi Joan Rouling, milliarder Ilon Mask hamda AQSHning sobiq prezidenti Donald Tramp ham bor.
Ayblanuvchilarning aynan qaysi postlari da’voga asos bo‘lgani aytilmagan. Ammo Variety nashri ta’kidlashicha, yozuvchi Halifning Olimpiadadagi janglaridan birini “jamoatchilikni qiziqtirish uchun ayolni kaltaklayotgan erkak tomoshasi” deb atagan.
Amerikalik suzuvchi Rayli Heyns Halifning jangi haqida izoh qoldirar ekan, “Ayollar sportida erkaklarga o‘rin yo‘q" deb yozgan. Ilon Mask “Absolutely!” (mutlaqo) deya sharh qoldirgan. Donald Tramp Halif jangidan olingan suratni e’lon qilib “Men erkaklarning ayollar sportiga kirishiga ruxsat bermayman!” deya sharh qoldirgan.
Eslatib o‘tamiz, Halif Parijdagi Olimpiadada boks bo‘yicha turnirda ishtirok etdi. Finalda u xitoylik Yang Liu ustidan g‘alaba qozondi. Ushbu g‘alaba Jazoirning ayollar boks tarixidagi birinchi g‘alabasi hisoblanadi. E’tiborlisi musobaqa davomida Imanning ishtiroki tufayli mojaro kelib chiqdi. Bunga italiyalik Anjela Karini 1/8 final bosqichida Halif bilan jangni davom ettirishdan bosh tortgani sabab bo‘ldi. Karini bir daqiqa o‘tar-o‘tmas ko‘z yoshlari bilan ringni tark etdi.
Qayd etish joiz, sportchi 2023-yilgi Jahon chempionatida IBA tomonidan o‘tkazilgan gender testidan muvaffaqiyatsizlikka uchragani ortidan diskvalifikatsiya qilingan edi.
Izoh (0)