Demokratik partiyadan AQSH prezidentligiga nomzod Kamala Harris kelgusida prezident sifatida Vladimir Putin bilan Kiyev ishtirokisiz Ukrainadagi harbiy harakatlarni tugatish bo‘yicha muzokaralar o‘tkazmasligini ma’lum qildi.
Uning so‘zlariga ko‘ra, Ukraina “kelajagi borasida o‘z ovoziga ega bo‘lishi kerak”.
“Ukrainasiz ikki tomonlama muzokara o‘tkazilmaydi. Ukraina kelajagi uchun o‘z so‘zini aytish huquqiga ega bo‘lishi kerak”, deydi Harris.
Avvalroq Respublikachilar partiyasidan prezidentlikka nomzod Donald Tramp Harris Ukraina—Rossiya urushi boshlanishidan uch kun oldin Vladimir Putin bilan suhbatlashganini ma’lum qilgandi. Uning so‘zlariga ko‘ra, Harris “Ukrainaga kirmasligi uchun Putin bilan uchrashishga yuborilgan”. Harris Trampning bayonotlarini yolg‘on deb atagan.
Putin bilan 2000-yildan beri ishlagan prezident matbuot kotibi Dmitriy Peskov iyul oyida Putin va Harris o‘rtasida bironta ham muloqot bo‘lganini eslolmasligini ma’lum qilgan. Ochiq manbalarda ham bunday uchrashuvlar haqida hech qanday ma’lumot berilmagan.
Izoh (0)