Rossiyada migrantlarni chiqarib yuborish rejimi joriy etilishi mumkin

Rossiya Davlat dumasining MDH ishlari bo‘yicha qo‘mitasi migratsiya sohasida nazoratni kuchaytirish, jumladan, muhojirlarni chiqarib yuborish rejimiga oid qonun loyihasini birinchi o‘qishda maʼqulladi. Bu haqda “Interfaks” xabar berdi.

Deportatsiyaning yangi tartibi Rossiyada qonuniy bo‘lish huquqiga ega bo‘lmagan xorijliklarga nisbatan qo‘llaniladi. Bunda Rossiyada vaqtincha bo‘lish yoki migratsiya hujjatlarining muddati tugagani, vaqtinchalik yashash uchun ruxsatnomaning bekor qilingani va boshqa noqonuniy xatti-harakatlar inobatga olinadi.

Migrant Rossiyadan chiqib ketgan, huquqiy holati tartibga solingan yoki o‘lim holati kuzatilganda unga nisbatan rejim bekor qilinadi. Chiqarib yuborish rejimini joriy etish Rossiyada noqonuniy bo‘lgan xorijlikning quyidagi huquqlarini cheklashni nazarda tutadi:

— ichki ishlar organining ruxsatisiz Rossiyada yashash yoki yashash joyini o‘zgartirish;

— nazorat ostidagi shaxs yashaydigan Rossiya subyektidan tashqarida sayohat qilish;

— transport vositalarini boshqarish, haydovchilik guvohnomasini olish;

— ko‘chmas mulk, transport vositalar olish yoki o‘zlashtirish, ushbu mulkni davlat organlarida ro‘yxatdan o‘tkazish;

— nikohni ro‘yxatga olish;

— yakka tartibdagi tadbirkor sifatida ro‘yxatdan o‘tish;

— kredit shartnomasini tuzish, bank hisobvaraqlarini ochish, pul o‘tkazmalarini amalga oshirish va boshqa yo‘llar bilan Rossiyadagi banklar va boshqa kredit tashkilotlaridagi hisobvaraqlardagi mablag‘larni boshqarish.

Bundan tashqari huquq-tartibot idoralari xodimlari nazorat ostidagi shaxs bo‘lgan binolar va hududlarga qarshiliksiz kirishi mumkin bo‘ladi.