“Migrant.uz” Moskvaga kiritilmagan 30 ga yaqin o‘zbekistonlik Sheremetevo aeroportida qolayotgani haqida xabar bergan edi. Unda aytilishicha, ularga beriladigan kunlik ovqatlar to‘xtatilgani, kutish zalidagi o‘rindiqlarda yotishgani, vatanga qaytarib yuborilishi kechiktirilayotgani aytilgan.
Aeroportga qamalib qolgan muhojirlar O‘zbekistonning Moskvadagi konsulligiga qo‘ng‘iroq qilib yordam so‘rashgan, ammo umumiy javobdan boshqa hech qanday javob yoki yordam bo‘lmagani qo‘shimcha qilingan.
Holat yuzasidan O‘zbekiston Tashqi ishlar vazirligi axborot xizmati “Daryo”ga izoh berdi.
Bu masalada O‘zbekistonning Rossiyadagi elchixonasi konsullik bo‘limi xodimlari Sheremetevo aeroportiga borishgan va vaziyatni o‘rganishgan. Haqiqatan ham u yerda O‘zbekiston fuqarolari borligi va ularga Rossiya Federatsiyasiga kirishga taqiq qo‘yilgani aniqlangan. Hozirgi kunda Rossiyaga kirish qonun-qoidalari ancha kuchaytirilgan bo‘lib, tekshiruvlar va suhbatlar olib borilmoqda, deyiladi vazirlik axborotida.
Qo‘shimcha qilinishicha, aeroportda qolib ketgan o‘zbekistonlik fuqarolarning barchasi 14-15-avgust kunlari vatanga qaytgan.
Tashqi ishlar vazirligining eslatishicha, O‘zbekiston fuqarolariga qandaydir muammo yoki masala bo‘lsa, quyidagi raqamlarga aloqaga chiqishlari mumkin:
- O‘zbekistonning Moskvadagi elchixonasi konsullik bo‘limining Call-markazi: +7 (499) 238-36-20; +7 (499) 230-00-76.
- O‘zbekiston Tashqi mehnat migratsiyasi agentligining Moskva shahridagi vakolatxonasiga. Aloqa raqami: +7 (925) 045-47-44; +7 (903) 010-13-38.
Izoh (0)