Muhojirlar Amerika jamiyatini rivojlantirib va o‘zgartirib kelgan qatlam sanaladi. Turli madaniyatlar va bilimlar ta’sirlashishi natijasida AQSH davlati bugungi kunda katta salohiyatga ega mamlakatlardandir. Ushbu maqolada Amerikaning rivojlanishiga o‘z hissasini qo‘shgan Gollivud yulduzlaridan tortib siyosatchilargacha bo‘lgan bir nechta shaxslarni yodga olamiz.
Arnold Shvarsenegger

Aktyor va bodibilder Shvarsenegger amerikacha orzusi ortidan vatani Avstriyani tashlab AQSHga ko‘chib kelgan va maqsadiga erishgan. Hozirda u Gollivud yulduzi va yetuk siyosatchi sifatida butun dunyoga tanilgan.
Natali Portman

Kino aktrisa asli Isroilning Quddus shahrida tavallud topgan. Natali Portman ikki davlat — AQSH va Isroil fuqaroligiga egadir.
Entoni Hopkins

“Qo‘zilar sukunati” va “Gannibal” filmlari yulduzi Hopkins aslida Uelslikdir. Uning Gollivuddagi karyerasi ajoyib tarzda o‘tgan. Aktyor 2000-yilda AQSH fuqaroligini olgan va ko‘proq vaqtini Kaliforniyaning Malibu shahrida o‘tkazadi.
Albert Eynshteyn

Albert Eynshteyn, ehtimol, Qo‘shma Shtatlarga ko‘chib kelgan eng obro‘li shaxslardan biri. Mashhur fizik olim Germaniyaning Ulm shahrida tug‘ilgan. U Prinston universitetida ishlagan va 1940 yilda Amerika fuqaroligini olgan.
Emili Blant

Mashhur britaniyalik aktrisa 2008-yilda AQSHga ko‘chib kelgan va 2015-yilda davlat fuqaroligini olgan. U Nyu York va ba’zan Londonda yashaydi.
Sergey Brin

Asli Moskvadan (Rossiya) bo‘lgan Google asoschilaridan biri Sergey Mixaylovich 90-yillarning oxirida Larri Peyj bilan birgalikda Microsoft va Apple kabi kompaniyalardan zaif bo‘lmagan Google’ni yaratdi va raqamli iqtisodiyotning poydevorini qo‘ydi. Shuningdek, u dunyodagi eng boy odamlardan biridir.
Pirs Brosnan

1995–2002-yillar oralig‘ida Jeyms Bond haqidagi 4 ta filmda suratga tushgan Pirs Brosnan 2004-yilda AQSH fuqaroligini olgan. Uning asl vatani Irlandiyadir.
Kamila Kabello

Mashhur qo‘shiqchi kubalik va meksikaliklar oilasida voyaga yetgan. Olti yoshida u onasi bilan AQSH chegarasini bosib o‘tgan va 2008-yilda fuqarolikni olgan. “Meni ota-onam bu yerga olib kelganda ularning cho‘ntagida umiddan o‘zga hech narsa yo‘q edi”, — deydi xonanda.
Madlen Olbrayt

1997-yil 23-yanvar kuni Madlen Olbrayt AQSH davlat kotibi lavozimini egallagan tarixdagi birinchi ayolga aylangan edi. U o‘z vaqtida Chexoslovakiyada shu kabi nufuzli diplomatik lavozimda faoliyat yuritgan migrant — Yozef Kerbelning qizi hisoblanadi. U Praga shahrida tug‘ilgan va 1948-yilda Yevropadan Amerikaga ko‘chib o‘tgan.
Bryus Uillis

Gollivudning eng ko‘p maosh oluvchi aktyorlaridan biri va “O‘tda yonmas” filmi yulduzi Germaniyada tug‘ilgan. Uning otasi Amerika harbiy bazasida xizmat qilganligi uchun 1957-yilda Bryus ota-onasi va oila a’zolari bilan Nyu Jersi shtatiga ko‘chib kelgan.
Nikola Tesla

Mashhur ixtirochi 1856-yilda hozirgi Xorvatiya hududidagi, o‘sha paytda Avstriya imperiyasining bir qismi bo‘lgan Smilyane qishlog‘ida tug‘ilgan. 1884-yil iyun oyida Tesla Nyu Yorkka ko‘chib o‘tdi va 7 yil o‘tgach AQSH fuqaroligini oladi.
Sharliz Teron

Aktrisa Janubiy Afrikada tug‘ilgan bo‘lib, modellik faoliyati bo‘yicha AQSHga kelgan. Keyin esa Gollivudda karyerasini davom ettirish uchun Los-Anjelesga ko‘chgan va 2007-yilda AQSH fuqaroligini olgan.
Salma Hayek

Aktrisa Salma Hayek Meksikaning Koatsakoalkos shahridan bo‘lib, uning “Umrboqiylar”, “Tereza”, “Qurbon bo‘lgan muhabbat”, “Frida” va boshqa loyihalari dunyo bo‘ylab mashhurlikka erishgan.
Endryu Karnegi

1835-yil 25-noyabrda Shotlandiyaning Dan-Fermlin qishlog‘ida tug‘ilgan. Ishchilar sinfidan kelib chiqqan Karnegi Amerikadagi eng boy va saxovatli xayriyachilardan biriga aylangan.
Kristiana Amanpur

Mashhur jurnalist va teleboshlovchi kollejda o‘qish uchun Qo‘shma shtatlarga ko‘chib o‘tgan. U Buyuk Britaniyada tug‘ilgan. Otasi fors va onasi ingliz millatiga mansub. Kristiana Eronda ham tahsil olgan.
Izoh (0)