Shimoliy Koreya yetakchisi Kim Chen In Janubiy Koreya bilan avtomobil va temiryo‘l aloqalarini butunlay uzdi.
Bu qaror Janubiy Koreyada o‘tkazilayotgan va chegara zonalarini mustahkamlash bilan birga olib borilayotgan harbiy mashg‘ulotlar fonida qabul qilindi.
71 yildan beri ajralgan ikki davlat o‘rtasidagi vaziyat keskinlashishda davom etmoqda. Avvalroq Kim Chen Inning singlisi Kim Yo Chen KXDR o‘zining yadroviy arsenalini “cheksiz” ko‘paytirish niyatida ekanini ma’lum qilgan edi. Bunga javoban Janubiy Koreya prezidenti Yun Sek Yol yadro qurolidan foydalanish Shimoliy Koreya rejimining qulashiga olib kelishidan ogohlantirgan.
Shimoliy Koreyaning KCNA davlat agentligining xabar berishicha, Janubiy Koreya bilan chegarani to‘liq to‘sib qo‘yishning yana bir sababi Koreya yarim orolida AQSH strategik yadroviy qurollarini joylashtirishdir. Shimoliy Koreya Bosh shtabi bayonotida Janubiy Koreya AQSH bilan birga “asosiy va doimiy dushman” deb atalgan.
Ayni damda Kim Chen In keng ko‘lamli raketa sinovlarini o‘tkazishda davom etmoqda hamda Ukrainadagi harakatlarini qo‘llab-quvvatlash uchun Rossiyaga harbiy xizmatchilarni yubormoqda.
Shimoliy va Janubiy Koreya 1953-yilda Koreya urushi tugaganidan beri texnik jihatdan urush holatida qolmoqda. Ikki davlatni taxminan to‘rt kilometr bo‘lgan demilitarizatsiya zonasi ajratib turadi.
Izoh (0)