Janubiy Koreya delegatsiyasi 26-iyul kuni bo‘lib o‘tgan Olimpiya o‘yinlarida ochilish marosimida Shimoliy Koreya deb tanishtirildi. Bu haqda BBC nashri xabar berdi.
Manbada aytilishicha, eʼlon qiluvchilarning qaltis xatosi tufayli rasmiylar delegatsiya nomini adashtirib yuborgan. Oqibatda Seuldan uchib kelgan sportchilar Shimoliy Koreya nomi ostida maydonga chiqib kelgan.
Tashkilotchilarning eʼtiborsizligi tufayli ochilish marosimida “Koreya Xalq Demokratik Respublikasi” nomi ikki bor ishlatilgan. Eʼlon qiluvchilar ikki koreys mamlakati uchun bitta nom qo‘llagan. Bu esa Seul delegatsiyasining keskin noroziligiga sabab bo‘lgan.
Olimpiya o‘yinlari ochilish marosimini yoritib borayotgan telekanalda esa davlat nomlari to‘g‘ri qo‘llangan. Jiddiy xatoga yo‘l qo‘ygan Olimpiya o‘yinlari tashkilotchilari esa Janubiy Koreya sportchilaridan uzr so‘rab chiqqan.
Janubiy Koreya Sport vazirligi sharmandali holat yuzasidan keskin bayonot bergan. Yo‘l qo‘yilgan xato uchun Fransiyaga hukumat darajasida javob qaytarilishi bildirilgan.
Janubiy Koreya sport vazirining ikkinchi o‘rinbosari, og‘ir atletika bo‘yicha 2008-yilgi Olimpiya chempioni Jang Mi-Ran Olimpiya qo‘mitasi prezidenti Tomas Bax bilan uchrashishni talab qilgan. Unga jiddiy eʼtirozlari borligini bildirgan.
“Ochilish marosimida Janubiy Koreya delegatsiyasini tanishtirishda yo‘l qo‘yilgan xato uchun chuqur uzr so‘raymiz. Janubiy Koreya delegatsiyasi aʼzolari, Janubiy Koreya Sport vazirligi va tegishli tashkilotlarga uzrimizni izhor qilamiz”, deyilgan Xalqaro olimpiya qo‘mitasi matbuot bo‘limi xabarida.
Maʼlumot o‘rnida, Koreya Respublikasi bu yilgi Olimpiya o‘yinlariga 143 nafar sportchi jo‘natgan. Ular bahslarda 21 ta sport turi bo‘yicha bellashadilar. Shimoliy Koreya sportchilari esa 100 ga yaqin sportchi bilan ishtirok etib, 2016-yildan keyin ilk bor xalqaro o‘yinlarda qatnashmoqda.
Izoh (0)