Shimoliy Koreya yetakchisi Kim Chen In o‘zining bobosi Kim Ir Senning tug‘ilgan kuni munosabati bilan mamlakatning eng muhim bayrami sanalgan “Quyosh kuni”da futbol o‘yiniga tashrif buyurdi. Bu haqda La Prensa Latina xabar berdi.
Ma’lum qilinishicha, bu safar ham KXDR yetakchisiga uning to‘qqiz yoshli qizi Kim Chju E hamrohlik qilgan. U mamlakatning barcha asosiy tadbirlarida doimiy ravishda otasi bilan birga ko‘rinish beradi. Shu sababli u diktatorning vorisi sifatida qaraladi.
Yaqinda ular birga “Xvason-18” qit’alararo ballistik raketasini sinovdan o‘tkazish marosimida qatnashgandi. Bu safar ota va qiz KXDR poytaxtida Vazirlar Mahkamasi va Milliy mudofaa vazirligi a’zolari o‘rtasida bo‘lib o‘tgan futbol o‘yiniga bordi. Suratda tribunada faqat harbiylar bo‘lganini ko‘rish mumkin.
O‘yin “hayajonli” penaltilar seriyasidan keyin Mudofaa vazirligining 5:3 hisobidagi g‘alabasi bilan yakunlangan. Keyin ikki jamoa arqon tortish o‘ynagan va Mudofaa vazirligi yana g‘alaba qozongan.
Kim Chju E Kim Chen Inning yagona farzandi emas. Janubiy Koreya razvedkasi ma’lumotlariga ko‘ra, KXDR yetakchisining uch farzandi bor, to‘ng‘ich farzandi esa o‘g‘il. Kimning farzandlari 2010, 2013 va 2017-yillarda tug‘ilgani taxmin qilinmoqda.
Kim Chen Inning merosxo‘ri — Chju E haqida nimalar ma’lum?
2022-yil noyabrida Shimoliy Koreya yetakchisi Kim Chen In o‘zining qizi Chju Eni dunyoga birinchi marta ko‘rsatdi. Bungacha KXDRning 38 yoshli yetakchisining hech bir farzandi ommaga namoyish qilinmagan. Chju E mamlakatdagi eng yirik qit’alararo ballistik raketani ishga tushirish jarayonida otasi yonida ko‘rinish bergan.
Vashingtondagi Stimson markazining Shimoliy Koreya bo‘yicha eksperti Maykl Maddenning fikricha, Kim o‘z qizini ommaga olib chiqish orqali qizi hokimiyat davomchisi ekanini ko‘rsatishi mumkin. Yanvar oyida Shimoliy Koreya yetakchisi qizi bilan qo‘shinlar va qit’alararo ballistik raketani tekshirish davomida ko‘rinish berdi. KXDR davlat axborot agentligi KCNA qizni Kim Chen Inning “eng sevimli” va “qimmatli” farzandi deb atadi.
Ayrim tahlilchilarning fikricha, Kim Chen In erta bosqichda hokimiyatning ehtimoliy merosxo‘ri nomini aytib, otasi yo‘l qo‘ygan xatodan qochishga harakat qilmoqda.
Izoh (0)