Шимолий Корея етакчиси Ким Чен Ин Жанубий Корея билан автомобиль ва темир йўл алоқаларини бутунлай узди.
Бу қарор Жанубий Кореяда ўтказилаётган ва чегара зоналарини мустаҳкамлаш билан бирга олиб борилаётган ҳарбий машғулотлар фонида қабул қилинди.
71 йилдан бери ажралган икки давлат ўртасидаги вазият кескинлашишда давом этмоқда. Аввалроқ Ким Чен Иннинг синглиси Ким Ё Чен КХДР ўзининг ядровий арсеналини “чексиз” кўпайтириш ниятида эканини маълум қилган эди. Бунга жавобан Жанубий Корея президенти Юн Сек Ёл ядро қуролидан фойдаланиш Шимолий Корея режимининг қулашига олиб келишидан огоҳлантирган.
Шимолий Кореянинг KCNA давлат агентлигининг хабар беришича, Жанубий Корея билан чегарани тўлиқ тўсиб қўйишнинг яна бир сабаби Корея ярим оролида АҚШ стратегик ядровий қуролларини жойлаштиришдир. Шимолий Корея Бош штаби баёнотида Жанубий Корея АҚШ билан бирга “асосий ва доимий душман” деб аталган.
Айни дамда Ким Чен Ин кенг кўламли ракета синовларини ўтказишда давом этмоқда ҳамда Украинадаги ҳаракатларини қўллаб-қувватлаш учун Россияга ҳарбий хизматчиларни юбормоқда.
Шимолий ва Жанубий Корея 1953 йилда Корея уруши тугаганидан бери техник жиҳатдан уруш ҳолатида қолмоқда. Икки давлатни тахминан тўрт километр бўлган демилитаризация зонаси ажратиб туради.
Изоҳ (0)