Shimoliy Koreya yana chiqindi bilan to‘ldirilgan havo sharlarini Janubiy Koreyaga uchirdi. Bu haqda Koreya Respublikasi Qurolli kuchlari axborotiga tayanib, Yonhap agentligi xabar berdi.
Bu bir hafta ichida sodir bo‘layotgan ikkinchi hodisa. Yonhap agentligi xabariga ko‘ra, 28 va 29-may kunlari KXDR Janubiy Koreya tomon 260 ga yaqin havo sharlarini uchirgan edi.
Harbiy maʼlumotlarga ko‘ra, mahalliy vaqt bilan taxminan 20:45 atrofida o‘nga yaqin sharlar Janubiy va Shimoliy Koreya o‘rtasidagi chegara chizig‘ini kesib o‘tgan, shundan so‘ng ularning aksariyati Seulni o‘rab turgan Kyongi provinsiyasiga uchib ketgan. Birlashgan shtab boshliqlari fuqarolarga qulagan sharlarga yaqinlashmaslikni va bu haqda rasmiylarga xabar berishni tavsiya qilgan.
Bundan tashqari, Janubiy Koreya hukumati mahalliy aholiga noma’lum obyekt Shimoliy Koreyaning targ‘ibot varaqalari bo‘lishi mumkinligi haqida ogohlantirish matnini yuborgan. Mahalliy aholi ochiq havoda dam olishdan tiyilishga chaqirilgan.
Endilikda Janubiy Koreyada yashovchi faollar va shimoliy koreyalik defektorlar shu yo‘l bilan KXDRga hukumatga qarshi varaqalar, pullar, shuningdek, taqiqlangan gazeta va kitoblarni jo‘natishmoqda. Shimoliy Koreya bir necha bor bunday harakatlarni to‘xtatishga chaqirgan va 26-may kuni Shimoliy Koreya rasmiylari javob choralari bilan tahdid qilgan.
Axlat sharlarini uchirgach, Shimoliy Koreya yetakchisining singlisi Kim Yo Chen mamlakat harakatlarini “so‘z erkinligi” ko‘rinishiga, Janubiy Koreya varaqalari mazmunini esa “siyosiy axlat”ga qiyoslagan.
Janubiy Koreyaning avvalgi hukumatlari faollarning bunday kampaniyalarni o‘tkazishini to‘xtatishga urinib, ular tinchlikni targ‘ib qilmasligini va chegara yaqinidagi aholi xavfsizligiga tahdid solayotganini aytishgan. 2021-yilda kiritilgan havo sharlarini uchirishni taqiqlash keyinchalik Oliy sud tomonidan so‘z erkinligini buzganligi sababli konstitutsiyaga zid deb topilgan.
Izoh (0)