AQSHning sobiq prezidenti Donald Trampga suiqasd uyushtirishda gumon qilingan Rayan Uesli Rut Rossiya prezidenti Vladimir Putin hamda Shimoliy Koreya yetakchisi Kim Chen Inni o‘ldirmoqchi bo‘lgan.
Bu haqda The Wall Street Journal (WSJ) nashriga 2022-yilda Ukrainada hamshira bo‘lib ishlagan va u yerda Rut bilan bir necha bor uchrashgan amerikalik Chelsi Uolsh xabar berdi.
Ayol ish paytida xulq-atvori unga “yirtqich” va “antisotsial” tuyulgan odamlar ro‘yxatini tuzgan. Rayan Rut ushbu ro‘yxatda birinchi bo‘lgan. Kiyevdagi birinchi uchrashuvida Rut ayolga g‘ayrioddiy tuyulgan, keyingi o‘nlab uchrashuvlar davomida hamshira erkakning xavfli ekanini payqagan. Ayolning so‘zlariga ko‘ra, Rut Putin va Kim Chen Inni o‘ldirish istagi haqida gapirgan, shuningdek, Tramp va AQSH prezidenti Jo Baydenni tilga olgan. Hamshira amerikalik oxirgi ikki siyosatchiga tahdid qilganmi yoki yo‘qligini eslay olmagan.
Ukrainaga harbiy amaliyotlarda qatnashish uchun kelgan ismini oshkor etmagan Fransiya fuqarosi WSJ nashriga Rayan Rut unga Ukraina armiyasi bo‘linmasida lavozim olishiga yordam berganini aytgan. Fransuzning ta’kidlashicha, Rut Trampdan g‘azablangan, uni “Ukrainani haqiqatda qo‘llab-quvvatlash o‘rniga Putin bilan kelishuvga erishishga harakat qilgan”likda ayblagan. AQSH Markaziy razvedka boshqarmasining sobiq xodimi Sara Adamsning so‘zlariga ko‘ra, Ukrainadagi ko‘ngillilar orasida Rut “firibgar va ruhiy kasal odam sifatida tanilgan”. U xorijlik jangchilarni yollashda Ukraina hukumati bilan hamkorlik qilishini bir necha bor iddao qilgan.
Reuters’ga ko‘ra, Rayan Rut deyarli 12 soat davomida golf maydonida Donald Trampni kutib o‘tirgan. Shu bilan birga, siyosatchining u yerga kelishi ommaviy ravishda e’lon qilinmagan va gumonlanuvchi uning rejalari haqida bilgani yoki yo‘qligi noma’lum.
Suiqasd qilishga urinish 15-sentyabr oqshomida sodir etilgan. Sud Rayan Rutni qurol saqlashda ayblagan. Hibsga olish bo‘yicha sud majlisi 23-sentyabrga belgilangan.
Izoh (0)