Koreya Respublikasi Rossiya va Belarusga qarshi savdo sanksiyalariga rioya etilishi ustidan nazoratni kuchaytiradi va ularni chetlab o‘tishga urinishlarga qarshi kurashadi. Bu haqda Janubiy Koreya Savdo, sanoat va energetika vazirligi bayonotiga tayanib, “TASS” xabar berdi.
“Vazirlik va tegishli idoralar, jumladan, Tashqi ishlar vazirligi, bojxona xizmati va razvedka xizmatlari o‘zaro hamkorlikdagi davlatlar bilan birgalikda cheklovlarni chetlab o‘tuvchi va uchinchi davlatlar orqali Rossiyaga noqonuniy eksportni amalga oshiruvchi kompaniyalarni aniqlaydi”, — deyiladi xabarda.
23-fevral kuni Qo‘shma Shtatlar Rossiyaga Amerika stanoklarini yetkazib berish bilan shug‘ullangani aytilayotgan Janubiy Koreya kompaniyasiga nisbatan sanksiyalar joriy etilishini e’lon qilgan.
Vazirlik nazoratni chetlab o‘tishga urinishlar va aylanma yo‘llar orqali yetkazib berishlar soni oshayotgani sababli tegishli davlat organlari bilan hamkorlikda eksport nazoratini puxtaroq amalga oshirishini qo‘shimcha qilgan.
Ukraina—Rossiya urushi boshlangandan so‘ng Koreya Respublikasi Rossiyaga qarshi sanksiyalar joriy qilgan va Moskva Janubiy Koreyani do‘stona bo‘lmagan davlatlar qatoriga qo‘shgan edi.
Izoh (0)