Toshkent shahrining Yangihayot va Surxondaryo viloyatining Jarqo‘rg‘on tumanida yer maydonlari olib berishni vaʼda qilgan shaxslar ushlandi. Bu haqda Bosh prokuratura huzuridagi Iqtisodiy jinoyatlarga qarshi kurashish departamenti xabar berdi.
Maʼlum qilinishicha, fuqarolar M.M., F.T. va boshqalar o‘zaro til biriktirib, Yangihayot tumani hududidagi davlat zaxirasida bo‘lgan 7 sotix yer maydonini fuqaro T.M.ga go‘yoki yuqori lavozimlarda ishlovchi tanishlari yordamida 175 ming dollar evaziga kadastr hujjatlarini rasmiylashtirib olib berishlarini vaʼda qilib, oldindan 25 ming dollarni olgan vaqtida ashyoviy dalilar bilan ushlangan.
Shu kabi, fuqaro O.U. Jarqo‘rg‘on tumani “O‘zbekiston” MFY hududidagi tuman hokimligi zaxirasidagi 60 sotix yer maydonini fuqaro S.A.ga 300 mln so‘mga sotishga kelishib, keyinchalik kadastr hujjatlarini rasmiylashtirib berishini vaʼda qilib, 65 mln so‘m va 18 400 dollarni olgan vaqtida ashyoviy dalillar bilan ushlangan.
Mazkur holatlar yuzasidan Jinoyat kodeksining 25,168-moddasi (firibgarlik) va 28,211-moddasi (pora berish) bilan jinoyat ishlari qo‘zg‘atilib, tergov harakatlari o‘tkazilmoqda.
Izoh (0)