Тошкент шаҳрининг Янгиҳаёт ва Сурхондарё вилоятининг Жарқўрғон туманида ер майдонлари олиб беришни ваъда қилган шахслар ушланди. Бу ҳақда Бош прокуратура ҳузуридаги Иқтисодий жиноятларга қарши курашиш департаменти хабар берди.
Маълум қилинишича, фуқаролар М.М., Ф.Т. ва бошқалар ўзаро тил бириктириб, Янгиҳаёт тумани ҳудудидаги давлат захирасида бўлган 7 сотих ер майдонини фуқаро Т.М.га гўёки юқори лавозимларда ишловчи танишлари ёрдамида 175 минг доллар эвазига кадастр ҳужжатларини расмийлаштириб олиб беришларини ваъда қилиб, олдиндан 25 минг долларни олган вақтида ашёвий далилар билан ушланган.
Шу каби, фуқаро О.У. Жарқўрғон тумани “Ўзбекистон” МФЙ ҳудудидаги туман ҳокимлиги захирасидаги 60 сотих ер майдонини фуқаро С.А.га 300 млн сўмга сотишга келишиб, кейинчалик кадастр ҳужжатларини расмийлаштириб беришини ваъда қилиб, 65 млн сўм ва 18 400 долларни олган вақтида ашёвий далиллар билан ушланган.
Мазкур ҳолатлар юзасидан Жиноят кодексининг 25,168-моддаси (фирибгарлик) ва 28,211-моддаси (пора бериш) билан жиноят ишлари қўзғатилиб, тергов ҳаракатлари ўтказилмоқда.
Изоҳ (0)