Jizzaxda 2023-yili jami 145,7 gektar yer maydonlarini 3,2 mlrd so‘mga sotish holatlariga chek qo‘yilgani maʼlum qilindi. Bu haqda Bosh prokuratura matbuot xizmati xabar berdi.
Maʼlum qilinishicha, Jizzax viloyati prokuraturasi organlari tomonidan 2023-yil hamda 2024-yilning o‘tgan davrida yer sotish bilan bog‘liq tashkil etilgan jami 70 ta nazorat tadbirlari natijasiga ko‘ra, 412 ta prokuror nazorati hujjatlarini qo‘llash orqali 938 nafar yuridik va jismoniy shaxslarning buzilgan huquqlari tiklangan.
O‘tgan yilda tashkil etilgan nazorat tadbirlarida yer uchastkalari talon-toroj qilinishi bilan bog‘liq aniqlangan 100 ta va joriy yilning o‘tgan davrida 19 ta holatlar yuzasidan jinoyat ishlari qo‘zg‘atilgan.
O‘tkazilgan tezkor tadbirlar natijasida, 145,7 gektar yer maydonlarini 3,2 mlrd so‘mga sotish holatlariga chek qo‘yilgan. Shuningdek, 52 ta holatda 324,8 gektar yer maydoni tuman (shahar) hokimliklari zaxirasiga qaytarilishi taʼminlangan.
Jinoyat ishlari doirasida qishloq xo‘jaligi yerlariga yetkazilgan zarar va noqonuniy yer sotish bilan bog‘liq 4 mlrd 396 mln so‘m zarar aniqlanib, 2 mlrd so‘mga yaqin zarar undirilgan.
O‘zboshimchalik bilan egallangan 1 163 ta holatdagi yer uchastkalari aniqlanib, tegishli choralar ko‘rilgan.
Izoh (0)