Prezident qarori bilan Yangi Toshkent shahri barpo etiladigan yer maydonlari ro‘yxati belgilandi.
Unga ko‘ra, yangi shahar Toshkent shahri Toshkent viloyatining Yuqori Chirchiq va O‘rta Chirchiq tumanlaridagi 19 720,9 gektar yerda barpo etiladi:
- Yuqori Chirchiq tumanidan O‘zbekiston, Do‘stlik, Surankent, Turkiston, Guliston, Iyk ota, (Qibray) Nurmuhammedov mavzelari;
- O‘rta Chirchiq tumanidan Do‘stlik, Oxunbobyev, Kim Pen Xva mavzelari va Sholichilik instituti hududidagi qishloq xo‘jaligiga ixtisoslashgan yerlar ajratiladi.
Shundan qariyb 13 ming gektari qishloq xo‘jaligiga mo‘ljallangan (11 ming gektardan ortig‘i sug‘oriladigan) yerlar hisoblanadi. Ushbu yer uchastkalari aholi punktlari yerlari toifasiga o‘tkaziladi.
Qoraqalpog‘iston Vazirlar Kengashi va viloyatlar hokimliklari qishloq xo‘jaligiga mo‘ljallangan yer uchastkalari qisqarib ketishining oldini olish maqsadida 2028-yil 1-yanvarga qadar har yil yakunida teng ulushlarda ushbu qaror bilan toifasi o‘zgartirilayotgan sug‘oriladigan yer uchastkalari maydoniga teng yangi yerlar o‘zlashtirilishini va sug‘oriladigan yerlar toifasiga o‘tkazilishini ta’minlaydi.
Qishloq xo‘jaligiga mo‘ljallangan yerlarning ushbu qarorga muvofiq toifasi o‘zgartirilgani uchun qishloq xo‘jaligi va o‘rmon xo‘jaligi ishlab chiqarishi nobudgarchiliklari o‘rnini qoplash bo‘yicha kompensatsiya to‘lovlari undirilmaydi.
Yangi Toshkent shahrini barpo etishga mo‘ljallangan yer uchastkalaridan ularda belgilangan tartibda davlat mulki sifatida ro‘yxatdan o‘tkazilganidan hamda jismoniy va yuridik shaxslarga yetkazilgan zarar to‘liq qoplanganidan so‘ng boshqa maqsadlarda foydalaniladi.
Izoh (0)