Toshkent shahrining Yunusobod tumanida joylashgan Toshkent kimyo-texnologiya instituti qoshidagi akademik litsey negizida qaytadan maktab tashkil etish taklif qilinmoqda. Bu haqda “Gazeta.uz” xabar berdi.
Maʼlum qilinishicha, ushbu taklifni Bahodir Abduvaliyev shahar hokimi Shavkat Umurzoqov bilan uchrashuvda bildirgan. 9-aprel kuni Shavkat Umurzoqov tashrifi chog‘ida tuman hokimi Shoshtepa va Akbarobod mahallalari infratuzilmasi va qiyofasini yaxshilash bo‘yicha taqdimot o‘tkazgan.
Taqdimotda Bahodir Abduvaliyev Mega Planet savdo markazi yonidagi 26,5 gektar maydonda joylashgan Akbarobod mahallasini rivojlantirish chora-tadbirlari haqida gapirgan. U yerdagi 21 ta uyda 3248 nafar aholi istiqomat qiladi.
Nashrning tuman hokimi so‘zlariga asosan yozishicha, mahallaga avvallari shu hududda bo‘lgan maktab zarur. 2007-yilda 960 o‘rinli maktab binosi Toshkent kimyo-texnologiya instituti qoshidagi akademik litseyga berilgan bo‘lsa-da, u atigi 30 foiz quvvat bilan ishlamoqda. Binoning bir qismi musiqa maktabiga aylangan.
“Litseyga sektor mudiri bilan shaxsan o‘zim tashrif buyurdim. U yerda faqat 30 foiz o‘quv xonalari band, viloyatlardan kelgan talabalar tahsil olishadi. Sinf xonalarining 70 foizi bo‘sh. Shu bois litsey binosini kimyo sanoati tizimidan Maktabgacha va maktab taʼlimi vazirligi balansiga qaytarib, o‘sha yerda yana maktab tashkil etishni taklif qilaman. Bu mahalla uchun zarur”, — degan u.
Poytaxt hokimi Shavkat Umurzoqov bu taklifni ko‘rib chiqishini taʼkidlab, litseyni ko‘chirish uchun joy ajratish zarurligini bildirgan.
Tuman hokimining maʼlum qilishicha, litsey hududidagi 27,5 sotixli uchta bo‘sh yer uchastkasini (1 gektar uchun 65 ming dollar) auksion orqali sotish yo‘li bilan 22,5 mlrd dollar jalb qilish kutilmoqda. Gap “o‘lik va foydalanilmayotgan” hovuz haqida ketmoqda, dedi u. Savdodan tushgan mablag‘ni mahallani obodonlashtirish, maktabni taʼmirlashga yo‘naltirish rejalashtirilgan.
2024-yilda Akbarobod mahallasida 9,5 milliard so‘mlik ishlar amalga oshirilishi rejalashtirilgan.
Iqtisodchi Otabek Bakirov maktablar hududidagi sotib yuborilgan yer maydonlarini qaytarish o‘rniga, qolganiniyam sotish yangi to‘lqin bilan davom etishi mumkinligini yozmoqda.
“Tasdiqlanganidan keyin mahallabay yurishni boshlagan poytaxt hokimiga sotish mumkin bo‘lgan yer maydonlarini prezentatsiya qilishni boshlashgan. Ular orasida ilgari maktab bo‘lgan va yana maktabga aylantirilishi ko‘zlangan litseyning 27,5 sotixli yer maydoni ham bor. Emishki, bu joy o‘lik va foydalanmayotgan basseyn emish. Sotishdan tushgan pulga mahallani obodonlashtirish va maktabni taʼmirlashga ishlatilarmish.
Hokim bilan uchrashuvda hozir bo‘lganlarning hech biri maktab maydoniga tegmaylik, qursak, o‘rniga yana maktab quraylik demagan. Loaqal birontasi turib o‘sha sotmoqchi bo‘lgan yer maydonining puliga kamida 500 o‘rinli yangi maktab binosi qursa bo‘ladiku, deb so‘ramagan.
Agarda hozir shu bitta maktab misolida yer sotish boshlansa, uni to‘xtatib qolib bo‘lmaydi. ”Yunusobod tajribasi“ degan ahmoqona metodichka bilan butun O‘zbekistonga yoyiladi. Hech kim saylamagan hokimlar va ularning ochofat shotirlari maktablarning yer maydonlariga ko‘z olaytirib turibdi. Doimgidek, hech narsani hal qilmaydigan maktabgacha va maktab taʼlimi vazirligi og‘ziga tolqon solib o‘tiripti.
Maktablarning bo‘sh hududiga faqat taʼlim jarayoniga oid bino va inshootlar qurilishi kerak. bu basseyn, bu sport zali, bu kutubxona bo‘lishi mumkin. Agar chuqur iqtisodiy asoslansa, davlat xususiy sherikchilik asosida xususiy maktab qurishni ham o‘ylab ko‘rsa bo‘ladi, undan ortiq emas.
Hurmatli qaror qabul qiluvchilar, byudjet tizimidagi maktablar, shifoxonalar, universitetlar makoni ”xususiylashtirishdan“ daxlsiz bo‘lishi va ularning hududini sotish qonun bilan taqiqlanishi zarur.
Maktablardan qo‘lingizni torting, hurmatsiz yersotarlar. O‘zbekiston kelajagiga chang solmang”, — deb yozadi iqtisodchi.
Izoh (0)