Toshkent viloyati hamda Andijon viloyatida yer maydonlarini sotmoqchi bo‘lgan shaxslar ushlandi. Bu haqda Bosh prokuratura huzuridagi Iqtisodiy jinoyatlarga qarshi kurashish departamenti xabar berdi.
Maʼlum qilinishicha, departamentning Toshkent viloyati boshqarmasi va IIV xodimlari hamkorligida o‘tkazilgan tezkor tadbirda fuqaro G.Y. fuqaro A.X.ning ishonchiga kirib, go‘yoki yuqori lavozimda ishlovchi tanishlari yordamida Yangiyo‘l tumanidagi “S.” va “A.O.” shirkati aʼzolariga tegishli bo‘lgan 112 sotix yer maydonini 227 ming 400 dollar evaziga uning nomiga rasmiylashtirib olib berishini vaʼda qilib, ushbu pullar hisobidan 30 ming dollarni olgan vaqtida ashyoviy dalillar bilan ushlangan.
Shu kabi, departament hamda DXXning Andijon viloyati boshqarmalari tomonidan o‘tkazilgan tezkor tadbirda Asaka tumanida faoliyat yurituvchi “O.Y.” fermer xo‘jaligi ish yurituvchisi F.A. va “S.P.”fermer xo‘jaligi rahbari I.S. o‘zaro til biriktirib, “O.Y.” fermer xo‘jaligiga uzoq muddatga sotish huquqisiz ajratilgan 30 sotix yer maydonini fuqarolar O.V. va X.T.ga firibgarlik yo‘li bilan sotishga kelishib, go‘yoki kadastr bo‘limida ishlovchi tanishlari yordamida yer maydoni hujjatlarini rasmiylashtirib berishni aytib, 30 ming dollarni olgan vaqtida ashyoviy dalillar bilan ushlangan.
Departamentning Parkent tuman bo‘limi tomonidan o‘tkazilgan tergovga qadar tekshiruvda fuqaro M.M. qo‘shnisi B.U.ning ishonchiga kirib, unga “Markaziy” MFY hududidagi 12 sotix yer maydonini go‘yoki yuqori lavozimda ishlovchi tanishlari yordamida rasmiylashtirib olib berishini vaʼda qilib, evaziga 31 mln so‘m va 3 ming dollarni firibgarlik yo‘li bilan qo‘lga kiritib, o‘z ehtiyojlari uchun ishlatib yuborgani aniqlangan.
Tekshiruv davomida M.M.tomonidan 10 mln so‘mning qaytarilishi protsessual tartibda rasmiylashtirilgan.
Mazkur holatlar yuzasidan Jinoyat kodeksining 168-moddasi (firibgarlik) va 28, 211-moddasi (pora berish) bilan jinoyat ishlari qo‘zg‘atilib, tergov harakatlari o‘tkazilmoqda.
Izoh (0)