Qibraydagi 13 ta mahalla Toshkent shahri hududiga o‘tkazildi

Toshkent viloyati hokimligi Qibray tumanidan Toshkent shahrining Mirzo Ulug‘bek tumaniga o‘tgan ijtimoiy obyektlar to‘g‘risida ma’lumot berdi.

Ma’lum qilinishicha, Mirzo Ulug‘bek tumaniga jami 2294,6 gektar, shundan 1002,6 gektar qishloq xo‘jaligi yer maydonlari o‘tgan.

Bundan tashqari quyidagi obyektlarning Mirzo Ulug‘bek tumaniga o‘tkazilishi ta’minlangan:

• mahallar soni - 13 ta;
• yakka tartibdagi turar joylar - 9137 ta;
• noturar joylar - 428 ta;
• maktablar - 2 ta;
• maktabgacha ta’lim muassasalari - 4 ta;
• diniy muassasalar - 1 ta;
• qabristonlar - 2 ta;
• tibbiy muassasalar - 1 ta.

Ta’kidlanishicha, Qibray tumanidan Mirzo Ulug‘bek tumaniga o‘tayotgan aholining doimiy yashash manzili Toshkent shahri Mirzo Ulug‘bek tumani etib belgilangan.

Avvalroq Zangiota tumanidan Toshkent shahrining Sergeli tumaniga o‘tkazilgan ijtimoiy obyektlar to‘g‘risida ma’lumot berilgandi.

Eslatib o‘tamiz, 2020-yilning 5-avgust kuni Shavkat Mirziyoyev Toshkent shahri va Toshkent viloyatining o‘zaro chegaradosh bo‘lgan tumanlari hududlarini o‘zgartirish bo‘yicha tayyorlangan loyihalar taqdimoti bilan tanishgandi. O‘shanda aholiga qulaylik yaratish maqsadida shahardan Toshkent viloyatiga 1010 gektar, viloyatdan poytaxtga 10 196 gektar yer maydoni o‘tkazilishi rejalashtirilgan edi. Keyinroq Ulug‘bek shaharchasining aholisi Toshkent viloyati tarkibiga, shuningdek, Uchtepa tumani yashovchilari uchta mahalla Toshkent viloyatining Zangiota tumani tarkibiga o‘tkazishga qarshi chiqqandi.

2021-yil iyul oxirlarida Xalq deputatlari Toshkent shahar kengashi qarori bilan poytaxtning Sergeli, Bektemir va Mirzo Ulug‘bek tumanlari hududi Toshkent viloyatining Zangiota, Qibray, Yuqori Chirchiq va O‘rta Chirchiq tumanlari hisobiga 7,8 ming gektardan ko‘proqqa kengaytirilgani ma’lum bo‘ldi.