Namangan viloyatining To‘raqo‘rg‘on hamda Uchqo‘rg‘on tumanlarida yer maydonlarini sotmoqchi bo‘lgan shaxslar ushlandi. Bu haqda Bosh prokuratura huzuridagi Iqtisodiy jinoyatlarga qarshi kurashish departamenti xabar berdi.
Maʼlum qilinishicha, To‘raqo‘rg‘on tumanida fuqaro I.M. turmush o‘rtog‘i Yu.N.ning nomiga auksion orqali xarid qilgan “Obod namuna diyori” massivida joylashgan 1 gektar yer maydonini fuqaro Sh.X.ga firibgarlik yo‘li bilan 10 ming dollarga sotishga kelishgan.
So‘ng uning nomiga hujjatlarini rasmiylashtirib berishini aytib, kelishilgan pullar hisobidan 6 900 dollar va 15 mln so‘mni olgan vaqtida ashyoviy dalillar bilan ushlangan.
Shuningdek, Uchqo‘rg‘on tumanida “Q.S.” MCHJning Uchqo‘rg‘on filiali rahbari M.A. MCHJga qarashli 8 sotix yer maydonini fuqaro G.B.ga go‘yoki yuqori lavozimda ishlovchi tanishlari yordamida uning nomiga kadastr hujjatlarini tayyorlatib sotishini vaʼda qilgan.
Buning evaziga 5 500 dollarni firibgarlik yo‘li bilan olgan vaqtida ashyoviy dalillar bilan ushlangan.
Mazkur holatlar yuzasidan Jinoyat kodeksining 168-moddasi (firibgarlik) va 28, 211-moddasi (pora berish) bilan jinoyat ishlari qo‘zg‘atilib, tergov harakatlari o‘tkazilmoqda.
Avvalroq, Toshkent viloyatida “auksion o‘yinlari” orqali yer olib berish uchun 1,5 mln dollar talab qilgan shaxs qo‘lga olingani haqida xabar berilgandi.
Izoh (0)