Prezident Shavkat Mirziyoyev respublikaga namuna qilib ko‘rsatgan Qashqadaryoning G‘uzor tumanidagi “Do‘stlik-1,2,3” nasos stansiyasi soatiga 8,35 kilovatt elektr energiyasini iqtisod qilib, bir yilda qariyb 75 million kub metr suv chiqarish imkoniyatiga ega. Bu haqda G‘uzor tumani hokimi Bekzod Suyunov ma’lum qildi, deya xabar berdi “Daryo” muxbiri.
Ta’kidlanishicha, Zoir Mirzayev tashabbusi bilan Qashqadaryoda faoliyat yurituvchi jurnalist va blogerlar uchun press-tur tashkil etilib, hududdagi mavjud ekin maydonlarini sug‘orish inshootlari hamda nasos stansiyalari haqida ma’lumot berilgan.
“‘Do‘stlik-1,2,3’ nasos stansiyasi 21 million 233 ming dollarga qurib bitkazilgan bo‘lib, oltita nasos agregati o‘rnatilgan. Ularning har biri sekundiga 6 kub metr suv chiqarish quvvatiga ega. Yangi nasos stansiyasi ishga tushirilishi natijasida 21 ming gektar maydonda suv ta’minoti yaxshilandi. Bu nasos stansiya orqali biz yana 3 ming gektargacha yangi yer maydonlarini ochish imkoniyatiga egamiz. Nasos stansiya soatiga 8,35 kilovatt elektr energiyasini iqtisod qilib, bir yilda qariyb 75 million kub metr suv chiqarishga erishiladi”, — dedi hokim Bekzod Suyunov.
Hokimning ta’kidlashicha, “Do‘stlik-1,2,3” nasos stansiyasi qurilishi uchun sarflangan 21 million 233 ming dollarni 20 yilda qaytarish ko‘zda tutilgan. Biroq hokimlik investorlarni jalb qilib, sug‘oriladigan yer maydonlarida eksportbop mahsulotlarni yetishtirish va ularni eksport qilish orqali kredit mablag‘ini 10 yilda qaytarishni rejalashtirgan.
Hokimga ko‘ra, viloyatda yana 16 ta nasos stansiyasi qayta ta’mirlanadi.
“Viloyatda yana 16 ta nasos stansiyasi ta’mirlanishi ko‘zda tutilgan bo‘lib, shuning 5 tasi G‘uzor tumanida joylashgan. Mana shu 5 ta nasos stansiyasi 12,5 million yevroga qayta ta’mirlanishi reja qilingan. Bu biz uchun yana yangi ishni o‘rni va yanada yangi imkoniyatlar eshigini ochadi”, — deydi G‘uzor hokimi.
Qayd etilishicha, nasos statsiyasidagi barcha texnologiya va qurilmalar masofadan turib boshqariladi va nazorat qilinadi. Ishchilarning mehnat qilishi, dam olishi uchun hamma sharoitlar yaratilgan.
“Do‘stlik-1,2,3” nasos stansiyasining foydalanishga topshirilishi natijasida ilgari suv tanqisligidan zarar ko‘rib kelgan Qarshi tumanidagi 2 ta hamda G‘uzor tumanidagi 12 ta hududga suvni muammosiz yetkazib berish imkoniyati yaratilgan.
Izoh (0)