Toshkent va Farg‘ona viloyatlarida yer maydonlarini noqonuniy sotmoqchi bo‘lganlar ushlandi. Bu haqda Iqtisodiy jinoyatlarga qarshi kurashish departamenti axborot xizmati xabar berdi.
Xabarga ko‘ra, holatlardan biri Bosh prokuratura huzuridagi departamentning Parkent tuman bo‘limi tomonidan IIB xodimlari bilan hamkorlikda o‘tkazilgan tezkor tadbirda aniqlangan. Fuqaro I.Sh. “Samarobod” MFY hududidagi o‘zboshimchalik bilan o‘rab olingan 9 sotix yer maydoni fuqaro E.B.ga 270 million so‘mga sotishga kelishgan. Hujjatlarni tanishlar orqali rasmiylashtirib berishni vaʼda qilib, oldindan 20 000 dollarni olgan vaqtida ashyoviy dalillar bilan ushlangan.
Shu kabi departamentning Farg‘ona viloyat boshqarmasi tomonidan IIB xodimlari bilan hamkorlikda o‘tkazilgan tezkor tadbirda, O‘zbekiston tumani Qishloq xo‘jaligi bo‘limi hudud yer tuzuvchisi M.M. fuqaro G.R.ga 3 gektar yer maydonini auksion orqali arzon narxlarda yutib berish evaziga 4000 dollarni olgan vaqtida ashyoviy dalillar bilan ushlangan.
Ularning ikkisi ham muqaddam sudlangan bo‘lgan. Mazkur holatlar yuzasidan Jinoyat kodeksining 168-moddasi (firibgarlik) va 28, 211-moddasi (pora berish) bilan jinoyat ishlari qo‘zg‘atilib, tergov harakatlari o‘tkazilmoqda.
Izoh (0)