Davlat xavfsizlik xizmati xodimlari tomonidan Andijon va Qashqadaryo viloyatlarida yer maydonlarini noqonuniy sotish holatlariga chek qo‘ydi.
Andijon viloyatining Baliqchi tumanidagi chorvachilikka ixtisoslashgan masʼuliyati cheklangan jamiyat rahbari ushbu MCHJga chorva mollari uchun ozuqa ekini yetishtirish maqsadida, uzoq muddatga ijara asosida berilgan 2,5 gektar yer maydonini hamda ukasi o‘zi rahbarlik qilayotgan paxta va g‘alla yetishtirishga ixtisoslashgan fermer xo‘jalikning 17,5 gektar yer maydonini, jami 20 gektar yer maydonini o‘zaro til biriktirib, noqonuniy ravishda xaridorga 225 ming dollarga sotgan vaqtida ushlangan.
Andijon shahrida kuzatilgan holatda 34 va 31 yoshli aka-uka “Yer tuzish va ko‘chmas mulk kadastri” davlat korxonasining Andijon shahar filiali sobiq xodimi hamda rieltorlik xizmati ko‘rsatuvchi MCHJ rahbari bilan o‘zaro til biriktirib, o‘zganing ishonchiga kiradi va shahar hokimligi zaxirasidagi 33 sotix yer maydonini mansabdor tanishlari orqali uning nomiga rasmiylashtirib berish evaziga 52 ming dollar talab qilgan. Ammo ular so‘ralgan pul mablag‘ini MCHJ rahbarining xonasida olgan vaqtida ashyoviy dalillar bilan qo‘lga olingan.
Davlat xavfsizlik xizmatining Qashqadaryo viloyati bo‘yicha boshqarmasi xodimlari tomonidan Bosh prokuratura huzuridagi departament hamda IIB bilan hamkorlikda o‘tkazilgan tezkor tadbirda, Qamashi tumanida yashovchi 46 yoshli shaxs o‘zini go‘yoki tuman kadastr bo‘limi xodimi deya tanishtirib, Ko‘kdala tumanida istiqomat qiluvchi fuqaroning ishonchiga kirgan va boshqa bir fuqaroga tegishli bo‘lgan 40 sotix yer maydonini mansabdor tanishlari orqali uning nomiga rasmiylashtirib berish evaziga 12 ming dollar va 98 million 800 ming so‘m olgan vaqtida ushlangan.
Hozirda mazkur shaxslarga nisbatan jinoyat ishlari qo‘zg‘atilib, tergov harakatlari olib borilmoqda.
- Avvalroq Sirdaryoda besh gektar yer maydonini 40 ming AQSH dollariga sotishga uringan opa-uka qo‘lga olingan edi.
- Aprel boshlarida esa Navoiyda 80 gektar yerni 1 milliard so‘mga sotishga uringan shaxslar ushlangani,
- Samarqand va Farg‘onada noqonuniy yer sotish holatlariga chek qo‘yilgani to‘g‘risida xabar berilgandi.
Izoh (0)