Toshkent, Andijon va Farg‘ona viloyatlarida yer maydonlarining noqonuniy sotilishiga chek qo‘yildi. Bu haqda Bosh prokuratura huzuridagi departament xabar berdi.
Qayd etilishicha, departamentning Qibray tuman bo‘limi tomonidan IIV xodimlari bilan hamkorlikda tezkor tadbir o‘tkazilgan. Tadbirda A.U. va B.V. ismli shaxslar o‘zaro til biriktirib, “T.T.” MCHJga issiqxona qurish uchun uzoq muddatga ajratilgan yer maydonining 1,8 gektarini fuqaro E.M.ga firibgarlik yo‘li bilan 300 ming dollariga sotshga kelishgani aniqlangan. Ular go‘yoki yuqori lavozimda ishlovchi tanishi orqali hujjatlarni rasmiylashtirib berishni vaʼda qilib, oldindan 10 ming dollarini olgan vaqtlarida ashyoviy dalillar bilan ushlangan.
Shu kabi, departament hamda DXXning Andijon viloyati boshqarmalari tomonidan o‘tkazilgan tezkor tadbirda fuqaro M.A. va boshqalar Oltinko‘l tumanidagi “R.K.” fermer xo‘jaligiga qarashli 10 sotix yer maydonini fuqaro F.T.ga turar-joy qurish uchun 55 ming dollariga sotishga kelishib, shundan 15 ming dollarni olgan vaqtida ashyoviy dalillar bilan ushlangan
Departamentning Toshloq tuman bo‘limi tomonidan o‘tkazilgan tezkor tadbirda esa R.R. va A.K. ismli shaxslar fuqaro A.Q.ga Quvasoy shahri hududidan 8 ming dollari evaziga 9,6 sotix yer maydonini turar-joy sifatida rasmiylashtirib olib berishlarini aytib, shundan 3 ming dollarni olgan vaqtlarda ashyoviy dalillar bilan ushlangan.
Mazkur holatlar yuzasidan Jinoyat kodeksining 168-moddasi (firibgarlik) va 28, 211-moddasi (pora berish) bilan jinoyat ishlari qo‘zg‘atilib, tergov harakatlari o‘tkazilmoqda.
Noqonuniy yer savdolari
Aprel boshlarida Navoiyda 80 gektar yerni 1 milliard so‘mga sotishga uringan shaxslar qo‘lga olingani, Samarqand va Farg‘onada noqonuniy yer sotish holatlariga chek qo‘yilgani to‘g‘risida xabar berilgandi. Shuningdek, Qoraqalpog‘iston Respublikasi va Buxoro viloyatida yer maydonlari savdosi bilan bog‘liq firibgarlik holatlari fosh etilgan edi.
Izoh (0)