Jizzaxda “Hududgaz” bo‘lim boshlig‘i va MCHJ rahbari 64 gektar yerni sotishga uringanida ushlandi. Bu haqda IIV Tezkor-qidiruv departamenti xabar berdi.
Qayd etilishicha, “Hududgaz Jizzax” filiali qurilish va taʼmirlash bo‘limi boshlig‘i, “Jizzax neftgaz stroy” MCHJ rahbari bilan o‘zaro jinoiy til biriktirib, 26 yoshli fuqaroga Zafarobod tumani hududida “Jizzax neftgaz stroy” MCHJ nomiga baliqchilik faoliyatini rivojlantirish uchun 10 yil muddatga ijara asosida ajratilgan 40 gektar hamda o‘zining yeriga tutash bo‘lgan yana 24 gektar yer maydonini jami 800 million so‘mga sotishga kelishgan. Kelgusida davlat o‘rmon xo‘jaligi balansidagi 130 gektar yer maydonini o‘zining yuqori lavozimda ishlovchi vakolatli tanishlari orqali olib berishi evaziga 10 ming dollar berishni so‘ragan.
13-mart kuni Jizzax viloyati IIB xodimlari bilan hamkorlikda o‘tkazilgan tezkor tadbir davomida ikki nafar shaxs Jizzax shahrida joylashgan mehmonxonada kelishilgan pullardan 300 million so‘mini oldindan bo‘nak sifatida olgan vaqtida ashyoviy dalil bilan ushlangan.
Holat yuzasidan Iqtisodiy jinoyatlarga qarshi kurashish departamentining Do‘stlik tumani bo‘limi tomonidan jinoyat kodeksining 168-moddasi (firibgarlik) 4-qismi “a” bandi bilan jinoyat ishi qo‘zg‘atilib tergov harakatlari borilmoqda.
- Avvalroq Sirdaryoda besh gektar yer maydonini 40 ming AQSH dollariga sotishga uringan opa-uka qo‘lga olingan edi.
- Aprel boshlarida esa Navoiyda 80 gektar yerni 1 milliard so‘mga sotishga uringan shaxslar ushlangani,
- Samarqand va Farg‘onada noqonuniy yer sotish holatlariga chek qo‘yilgani to‘g‘risida xabar berilgandi.
Izoh (0)