Qozog‘istonda 27-yanvardan boshlab xorijliklar uchun yangilangan kirish qoidalari kuchga kirdi. Unga ko‘ra, endilikda Yevrosiyo iqtisodiy ittifoqi (YOII) mamlakatlari — Rossiya, Belarus, Armaniston va Qirg‘iziston fuqarolari uchun “vizaran” amaliyoti bekor qilinadi. Bundan keyin ular 6 oylik davrda respublikada faqat 90 kundan ortiq bo‘lmagan muddatga qolishi mumkin. Agar bu muddat oshib ketsa, mamlakatni tark etgan xorijlik qaytib kela olmaydi. Yangi qoidalar vaqtinchalik yashash uchun ruxsatnoma olgan shaxslarga nisbatan qo‘llanilmaydi.
Ilgari YOII mamlakatlari fuqarolari “vizaran” bilan Qozog‘iston chegarasini har uch oyda bir marta kesib o‘tib, qaytib kelishi mumkin edi. Bu amaliyot davlat hududida qonuniy yashash muddatini yangilash uchun yetarli edi.
Qozog‘iston bilan vizasiz rejimga ega bo‘lgan boshqa mamlakatlar, jumladan O‘zbekiston fuqarolari uchun respublikada qolish muddati 30 kun. Qozog‘istonda qolish muddatini uzaytirish uchun respublikada yashash ruxsatnomasi yoki vaqtinchalik yashash ruxsatnomasini olish kerak.
Respublika Ichki ishlar vazirligi Migratsiya xizmati qo‘mitasi tashqi migratsiya boshqarmasi boshlig‘i Asqar Aldo‘ng‘arov yangi cheklovlar faqat respublikaga 27-yanvardan keyin kirib kelgan xorijliklarga taalluqli bo‘lishini ta’kidladi.
Rossiyada safarbarlik e’lon qilinganidan keyin 400 mingdan ortiq rossiyalik Qozog‘istonga kirib keldi
2022-yilning sentabrida Rossiyada safarbarlik e’lon qilinganidan keyin ko‘plab rossiyaliklar Ukrainadagi urushga yuborilishdan qochib Qozog‘istonga kela boshladi. Qozog‘iston Ichki ishlar vazirligi Migratsiya xizmati qo‘mitasi ma’lumotlariga ko‘ra, sentabr oyida Rossiyaning 406 ming fuqarosi mamlakatga kirib kelgan, ularning aksariyati 21—30-sentabr orasida kelgan. Ungacha chegarani kuniga o‘rtacha 8—9 ming rossiyalik kesib o‘tgan bo‘lsa, sentabr oyi oxirida Rossiyadan o‘rtacha sutkalik oqim 30 ming kishiga yetdi, deb xabar berdi Tengrinews. Oktabr oyida Rossiyadan migratsiya oqimi barqarorlashdi va yil oxirida kuniga 6-7 ming kishidan oshmaydigan bo‘ldi.
Izoh (0)