Fransiya Ukrainaga qanday shart bilan qiruvchilar yetkazib berishi mumkinligini ma’lum qildi
Parij Kiyevga qiruvchilar yetkazib berishni istisno qilmaydi, ammo bu harakat urushning kuchayishiga olib kelmasligi, shuningdek, Yevropa xususan, Fransiyaning xavfsizligiga zarar yetkazmasligi shart. Bu haqda 26-yanvar kungi matbuot anjumanida Fransiya Milliy assambleyasining Milliy mudofaa va Qurolli kuchlar qo‘mitasi rahbari Tomas Gasillud ma’lum qildi.
“Har bir aniq vaziyat bo‘yicha so‘rovlarni ko‘rib chiqishimiz va barcha eshiklarni ochiq qoldirishimiz kerak. Buyog‘iga nima bo‘lishini yaqin haftalarda ko‘ramiz, chunki ishlar tez sur’atda davom etmoqda”, — deya tushuntirdi fransiyalik amaldor.
Shuningdek, u Fransiya Ukrainaga o‘zining Leclerc tanklarini yetkazib berishi dargumonligini ta’kidladi, chunki ular Kiyevga berilishi e’lon qilingan Amerika va Germaniya tanklari bilan “mos tushmaydi”.
“Ukrainaliklar uchun har xil turdagi tanklar bilan shug‘ullanish qimmat va qiyin bo‘ladi. Biz, masalan, yer-havo imkoniyatlari haqida o‘ylayapmiz”, — deb tushuntirdi Gasillud.
Eslatib o‘tamiz, Fransiya mudofaa vaziri Sebastyan Lekornu fevral oyida Fransiya Ukrainaga birinchi AMX10-RC g‘ildirakli yengil tanklarini yetkazib berishni rejalashtirayotgani haqida ma’lum qilgandi.
25-yanvar kuni AQSH hukumati Kiyevga 31 ta M1 Abrams og‘ir tanklarini topshirishini ma’lum qildi. O‘z navbatida, Germaniya hukumati ham Ukrainaga Germaniya qurolli kuchlari zaxirasidan 14 ta Leopard 2 tankini jo‘natishi va boshqa davlatlarga reeksport uchun ruxsat berishini tasdiqladi. Shu kuni Norvegiya va Slovakiya Mudofaa vazirligi ham tanklarni Ukrainaga o‘tkazish niyati borligini ma’lum qildi. Avvalroq Kiyevni tanklar bilan ta’minlash qarori Buyuk Britaniya, Fransiya va Polsha rasmiylari tomonidan e’lon qilingandi.
G‘arb davlatlari Kiyevga tanklar yetkazib berilishi haqida e’lon qilgach, Ukraina prezidenti Vladimir Zelenskiy mamlakat ulardan uzoq masofaga uchuvchi raketalar va jangovar samolyotlar olishni ham kutayotganini aytdi. Politico nashri xabar berishicha, G‘arb harbiy amaldorlari Ukrainaga qiruvchi samolyotlar yetkazib berish masalasini muhokama qilmoqda.
