Isroil mudofaa kuchlari (IMK) 27-yanvarga o‘tar kechasi G‘azo sektoridan mamlakat hududiga uchta raketa uchirilganini ma’lum qildi. Isroilning “Temir gumbaz” havo hujumidan mudofaa tizimlari Ashkelon yo‘nalishida otilgan raketalardan birini tutib olgan. Ikkinchi raketa Isroildagi ochiq maydonga, uchinchisi chegara yo‘lagiga qulagan.
IMK xabar berishicha, raketalarga javoban Isroil ham G‘azoga aviazarba yo‘llagan va HAMASning raketa ishlab chiqaruvchi yerosti inshootini yo‘q qilgan.
https://twitter.com/idfonline/status/1618816926905688065“Gʻazo sektorida sodir boʻlayotgan voqealar uchun HAMAS terrorchilik tashkiloti javobgar, aynan ular Isroil davlati xavfsizligini buzganlik uchun tovon to‘lamoqda”, — deyiladi IMKning Twitter’dagi xabarida.
OAV xabarlariga ko‘ra, G‘azodan otilgan raketalar Iordan daryosining g‘arbiy sohilidagi Jenin qochqinlar lagerida IMK operatsiyasi paytida to‘qqiz nafar falastinlikning o‘ldirilishiga javob bo‘ldi.
Al Jazeera va Falastinning WAFA axborot agentligi Isroil armiyasining operatsiyasi chog‘ida to‘qqiz falastinlik halok bo‘lgani, yana 20 nafari yaralangani haqida yozgandi. Qurbonlar orasida 60 yoshli ayol ham bor.
WAFA’ning yozishicha, 26-yanvar kuni ertalab Isroil harbiylari Jeninga kirgan. U yerda snayperlar tomlardagi pozitsiyalarni egallab, shiddatli toʻqnashuvlarni keltirib chiqargan, askarlar esa Isroil xavfsizlik kuchlari yoʻlini toʻsmoqchi boʻlgan yosh falastinliklarga qarata oʻt ochgan. WAFA ma’lumotlariga ko‘ra, Isroil armiyasi qochqinlar lageridagi elektr ta’minotini uzib qo‘ygan va u yerga tibbiyot xodimlari yoki jurnalistlarning kirishiga ruxsat bermagan.
Falastin rahbariyati Jenindagi otishmadan keyin Isroil bilan xavfsizlikni muvofiqlashtirish rejimi toʻxtatilganini eʼlon qildi. Jerusalem Post Falastin shunga o‘xshash qarorni 2020-yilda ham e’lon qilgani, ammo besh oydan keyin undan voz kechganini yozdi.
Falastin rahbariyati, shuningdek, Birlashgan Millatlar Tashkiloti Xavfsizlik Kengashiga murojaat yo‘llashga qaror qildi.
Izoh (0)