AQSH “Vagner” guruhini transmilliy jinoiy tashkilot deb e’lon qildi va unga aloqador kompaniyalarga sanksiyalar kiritdi
AQSH Moliya vazirligi “Vagner” xususiy harbiy kompaniyasini transmilliy jinoiy tashkilot deb e’lon qildi. Bu haqda vazirlik saytida xabar berildi.
“ ‘Vagner’ guruhiga qarshi bugungi kengaytirilgan sanksiyalar, shuningdek, ularning hamkorlari va Rossiya harbiy kompleksini rivojlantirishga hissa qo‘shayotgan boshqa kompaniyalarga nisbatan yangi sanksiyalar Putinning o‘z harbiy mashinasini qurollantirish va jihozlash imkoniyatlarini yanada cheklaydi”, — dedi AQSH moliya vaziri Jenet Yellen.
AQSH moliya vazirligi, shuningdek, “Vagner”ga aloqador bo‘lgan Rossiya, Xitoy, Lyuksemburg va Birlashgan Arab Amirliklari kompaniyalariga ham sanksiyalar kiritdi. Xususan, Xitoyning Spacety China kompaniyasi sanksiyalar ostida qoldi — AQSH ma’lumotlariga ko‘ra, u Ukrainaning sun’iy yo‘ldoshdan olingan suratlarini “Vagner”ga sotgan.
AQSH Moliya vazirligining sanksiyalar ro‘yxatiga, jumladan, Rossiya sanoat va savdo vazirligi rahbari Denis Manturov, Tatariston rahbari Rustam Minnixanov va Rossiya harbiy-sanoat majmuasining bir qator kompaniyalari kiritilgan.
CNN xabariga ko‘ra, AQSH davlat kotibi Entoni Blinken Ukrainadagi bosqinga aloqador rossiyalik 531 nafar harbiyga Amerikaga kirish uchun viza cheklovlari joriy etilishini aytgan. Bundan tashqari, Davlat departamenti “Vagner”ga rossiyalik mahbuslarni urushda qatnashishga yollashda yordam bergan Rossiya Federal Jazoni ijro etish xizmatining uch rahbariga qarshi sanksiyalar kiritmoqchi.
20-yanvar kuni Oq uy matbuot kotibi Jon Kirbi AQSH “Vagner” guruhini transmilliy jinoiy tashkilot sifatida belgilashni rejalashtirayotgani haqida ma’lum qilgandi. Guruh rahbari Yevgeniy Prigojin AQSH rasmiylarining bu niyatiga fikr bildirar ekan, “Va nihoyat, endi ‘Vagner’ va amerikaliklar — hamkasblar bo‘ldi. Bundan buyog‘iga o‘zaro munosabatlarimizni ‘jinoiy urug‘-aymoqlar o‘rtasidagi mojaro’ deb atash mumkin” dedi.
“Vagner” jangchilari Ukrainadagi jangovar harakatlarda faol ishtirok etmoqda, ular rasmiy ravishda RF Mudofaa vazirligiga hisobot bermaydi. Bundan tashqari, guruh Afrikaning turli mamlakatlarida faoliyat yuritadi.
