Rossiya prezidenti matbuot kotibi Dmitriy Peskov The Wall Street Journal nashrining Vladimir Putinga harbiy operatsiyaning borishi haqida ko‘pincha eskirgan axborot taqdim etilishi haqidagi maqolasiga izoh berdi. Kreml vakili davlat rahbariga noto‘g‘ri ma’lumotlar berilishini rad etdi.
WSJ manbalari da’vo qilishicha, Rossiya prezidenti uchun tashkil qilingan brifinglardagi ma’lumotlar Rossiya armiyasi yutuqlarini ta’kidlab, muvaffaqiyatsizliklarini esa kamaytirib ko‘rsatadi. Amerika gazetasi yozishicha, harbiy operatsiya haqidagi ma’lumotlar prezidentga borib yetgunicha bir nechta tuzilmalardan o‘tadi, bunga esa bir necha kun vaqt ketadi, natijada ular ko‘pincha “eskirib qoladi”.
Peskov WSJ savollariga javob berar ekan, harbiy operatsiyaning rejalashtirilishi haqida axborot maxfiy hisoblanishini aytdi. “Prezident, xuddi avvalgidek, ma’lumot olish uchun bir nechta kanallarga ega. Unga ma’lumotlar buzib ko‘rsatilayotgani haqidagi da’volarning hech biri haqiqatga to‘g‘ri kelmaydi”, — dedi Kreml vakili.
Rossiya Vladimir Putinning buyrug‘i bilan 24-fevraldan buyon Ukrainada harbiy operatsiya olib bormoqda. Rossiya Bosh shtabi boshlig‘i Valeriy Gerasimov 22-dekabr kuni jangovar to‘qnashuv chizig‘i 815 kilometrgacha cho‘zilib ketganini aytdi. Uning so‘zlariga ko‘ra, front chizig‘idagi vaziyat barqarorlashgan, Rossiya armiyasi o‘z kuchlarini Donetsk xalq respublikasida operatsiyani yakunlashga yo‘naltirmoqchi.
Avvalroq Urushni tadqiq qilish instituti (ISW) Putin Rossiya qo‘shinlarining Ukrainadagi muvaffaqiyatsizliklari uchun javobgarlikni boshqalarga to‘nkashga urinayotgani haqida yozgandi. Putin mas’uliyatni to‘nkamoqchi bo‘lganlardan biri — Rossiya Qurolli kuchlari Bosh shtabi boshlig‘i Valeriy Gerasimov, deydi ISW mutaxassislari. U yaqinda uzoq tanaffusdan so‘ng birinchi marta televizorda ko‘rsatilgan. Putin Ukrainadagi harbiy muvaffaqiyatsizliklar uchun javobgarlikni o‘zidan soqit qilmoqchiligi haqida avval Britaniya razvedkasi ham xabar bergandi.
Izoh (0)