AQSH prezidenti Jo Bayden 2023-moliya yili uchun 847,3 milliard dollarlik mudofaa budjetini imzoladi. Bu haqda Oq uy saytida e’lon qilingan xabarda aytiladi.
Ushbu summaning 800 million dollari Ukrainaga yordam uchun ajratilgan. 6 milliard dollarni AQSH Rossiyani Yevropada tiyib turish uchun ishlatadi. 10 milliardni esa Vashington Tayvanga harbiy ko‘mak uchun yo‘naltiradi.
Hujjat Rossiyaning xalqaro tashkilotlardan, shu jumladan, G20 dan chetlatilishini, Rossiya bilan oltinga aloqador operatsiyalar uchun sanksiyalarni, harbiy sohada Rossiya bilan hamkorlikka taqiqni besh yilga uzaytirishni ko‘zda tutadi. Moskva bilan raketaga qarshi mudofaa tizimlari haqida axborot almashishga nisbatan doimiy taqiq kuchga kiradi.
AQSH Kongressi mudofaa budjeti loyihasini 7-dekabr kuni ma’qullagan edi. Ukraina prezidenti Vladimir Zelenskiy Amerika mudofaa budjeti Ukraina aviatsiyasi imkoniyatlarini kengaytirishni o‘z ichiga olishini aytgandi.
Ma’lumot uchun, 2022-yilda AQSH mudofaa budjeti 770 milliard dollarni, 2021-yilda 740,5 milliard dollarni, 2020-yilda 740 milliard dollarni, 2019-yilda 738 milliard dollarni tashkil etgan.
Izoh (0)