Россия президенти матбуот котиби Дмитрий Песков The Wall Street Journal нашрининг Владимир Путинга ҳарбий операциянинг бориши ҳақида кўпинча эскирган ахборот тақдим этилиши ҳақидаги мақоласига изоҳ берди. Кремль вакили давлат раҳбарига нотўғри маълумотлар берилишини рад этди.
WSJ манбалари даъво қилишича, Россия президенти учун ташкил қилинган брифинглардаги маълумотлар Россия армияси ютуқларини таъкидлаб, муваффақиятсизликларини эса камайтириб кўрсатади. Америка газетаси ёзишича, ҳарбий операция ҳақидаги маълумотлар президентга бориб етгунича бир нечта тузилмалардан ўтади, бунга эса бир неча кун вақт кетади, натижада улар кўпинча «эскириб қолади».
Песков WSJ саволларига жавоб берар экан, ҳарбий операциянинг режалаштирилиши ҳақида ахборот махфий ҳисобланишини айтди. «Президент, худди аввалгидек, маълумот олиш учун бир нечта каналларга эга. Унга маълумотлар бузиб кўрсатилаётгани ҳақидаги даъволарнинг ҳеч бири ҳақиқатга тўғри келмайди», — деди Кремль вакили.
Россия Владимир Путиннинг буйруғи билан 24 февралдан буён Украинада ҳарбий операция олиб бормоқда. Россия Бош штаби бошлиғи Валерий Герасимов 22 декабрь куни жанговар тўқнашув чизиғи 815 километргача чўзилиб кетганини айтди. Унинг сўзларига кўра, фронт чизиғидаги вазият барқарорлашган, Россия армияси ўз кучларини Донецк халқ республикасида операцияни якунлашга йўналтирмоқчи.
Аввалроқ Урушни тадқиқ қилиш институти (ISW) Путин Россия қўшинларининг Украинадаги муваффақиятсизликлари учун жавобгарликни бошқаларга тўнкашга уринаётгани ҳақида ёзганди. Путин масъулиятни тўнкамоқчи бўлганлардан бири — Россия Қуролли кучлари Бош штаби бошлиғи Валерий Герасимов, дейди ISW мутахассислари. У яқинда узоқ танаффусдан сўнг биринчи марта телевизорда кўрсатилган. Путин Украинадаги ҳарбий муваффақиятсизликлар учун жавобгарликни ўзидан соқит қилмоқчилиги ҳақида аввал Британия разведкаси ҳам хабар берганди.
Изоҳ (0)