Zelenskiy Baydenni Ukraina g‘alaba qozonishiga ishontirgan, AQSHdagilar esa buni dargumon deb hisoblamoqda

Ukraina prezidenti Vladimir Zelenskiy Vashingtonga tashrif chog‘ida AQSH prezidenti Jo Baydenga va Kongressga Ukraina Rossiya bilan nizoda g‘olib chiqa olishini isbotlashga uringan. Bu haqda The Washington Post o‘z manbalariga tayanib xabar bermoqda. Gazeta qayd etishicha, amerikalik mansabdorlar voqealarning bunday rivojlanishi ehtimoli kam deb hisoblaydi.

Zelenskiy o‘z tashrifidan “qish sharoitidagi shafqatsiz janglar fonida ishonchsizlik kayfiyatidagi qonun chiqaruvchilar va boshqa amerikaliklardan qo‘llab-quvvatlashga erishish uchun” ham foydalangan. Gazeta eslatishicha, Vakillar palatasi tez orada Respublikachilar partiyasi nazorati ostiga o‘tadi, uning vakillaridan ba’zilari Ukrainaga ko‘makni qisqartirish yoki nazoratni kuchaytirishni yoqlab chiqmoqda.

Zelenskiyning Kongressdagi nutqini tinglagan demokrat senator Kris Myorfi fikricha, uning gaplari ta’sirga ega bo‘lgan. Senator Vakillar palatasi Ukrainani moliyalashtirishni saqlab qolishni qo‘llab-quvvatlaydi, degan fikrda.

WP yozishicha, Ukraina prezidenti bir necha oylar mobaynida Baydenga AQSHga tashrif buyurishga tayyorligini aytib kelgan, ammo uning mamlakatidagi vaziyat buni dekabrgacha amalga oshirish imkonini bermagan. Yakuniy qaror Jo Bayden bilan 11-dekabr kungi telefon qo‘ng‘irog‘i vaqtida qabul qilingan.

Vladimir Zelenskiyning AQSHga safari 21—22-dekabr kuni bo‘lib o‘tdi. Ukraina prezidenti Jo Bayden bilan uchrashdi va Kongress qarshisida nutq so‘zladi. Zelenskiy, xususan, harbiy ko‘makni oshirishni so‘radi. Bayden uning tashrifi chog‘ida Kiyevga Patriot zenit-raketa tizimlari berilishini e’lon qildi.

Avvalroq Zelenskiy hujum operatsiyalarini olib borish uchun zamonaviyroq qurol-yarog‘lar olishni rejalashtirgani, ammo AQSHga tashrifidan ko‘zlangan maqsadga erisha olmagani xabar berilgan edi.