Buxoro viloyatidagi Muruvvat bolalar uchun internat uyi bolalarni issiq ovqat bilan ta’minlash xizmatini ko‘rsatish bo‘yicha boshlang‘ich narxi 300 million so‘m bo‘lgan tender o‘tkazdi. “Daryo” muxbiri lot ma’lumotlarini ko‘zdan kechirish jarayonida shubhali holatlarga duch keldi.
Raqobatchilar begona emas
Tanlovda ikki MCHJ — “Oshxonalar tresti” hamda “Islam ibosh mega stroy” ishtirok etgan. O‘rganishlar davomida ushbu korxonalar bevosita aloqador ekani ma’lum bo‘ldi.
Tanlovda g‘olib chiqqan korxona — “Oshxonalar tresti” MCHJning asosiy ulushdori va rahbari Baymuradov Sherzod Yakubovich. U bir vaqtning o‘zida “Islam ibosh mega stroy” MCHJning ham 50 foiziga egalik qiladi. Ushbu korxonaning hamta’sischisi va rahbari — Boqiyev Behruz Shuhratovich.
Tanlovning yana bir ishtirokchisi “Islam ibosh mega stroy” MCHJ (o‘z nomini bir necha yil oldin “Bukhara golden grup invest” MCHJga o‘zgartirgan). Korxona ovqat bilan ta’minlashga emas, yashash uchun mo‘ljallanmagan binolarni qurishga ixtisoslashgan. Korxona ta’sischisi va rahbari — Boqiyev Lazizbek Shuhratovich.
Ya’ni, tenderda g‘alaba qozongan korxona rahbari Sherzod Boymurodov unga raqobat qilgan korxona rahbari Behruz Boqiyevning yo akasi, yoki ukasi Lazizbek Boqiyevga tegishli korxona aksiyadori.
5 ball o‘rniga 20 ball
Shubhali holatlardan yana biri — xarid komissiyasi ishtirokchilarni baholashda texnik topshiriq mezonlariga amal qilmagan. Misol uchun, korxonaning soliqlardan qarzdorliklari to‘g‘risidagi ma’lumotlar 5 balldan baholanishi lozim bo‘lsa-da, ishtirokchilarga 20 balldan berilgan.
Shuningdek, ishtirokchilar boshlang‘ich narx bilan teng miqdorda taklif berishgan bo‘lsa-da, xarid komissiyasi a’zolari ularni yuqori baholagan.
Rais bexabar
“Daryo” muxbiri xarid komissiyasi raisi Dilmurod Xodjiyev bilan bog‘landi. U o‘tkazilgan ushbu tenderdan xabari yo‘qligi va hujjatni o‘zi imzolamaganini bildirdi. Agar bu rost bo‘lsa, raisning xabari bo‘lmagan, ushbu xaridni kim o‘tkazgan, ovoz bergan va imzolagan?
Mas’ullar ushbu masalaga ham e’tibor qaratadi, deb umid qilamiz.
“Daryo” shubhali tenderlarni kuzatishda davom etadi.
Izoh (0)